Soñğı yıllarda ällä küpme yaña uqu yortları açıldı. Telägän cireñä uqırğa ğına ker. Tik moña qarap, uqu yortlarında konkurslar kimemi, ä arta ğına bara. Ä inde Qazan uqu yortları üze ber ayırım tema. Däräcä dä zur, uqırğa kerergä teläüçelär dä küp. Tatarstanlılar ğına tügel, ällä qaylardan kilälär uqırğa. Bıyıl da, ğädättägeçä, yäşlär iqtisat belgeçlären äzerläwçe urınğa omtıla. Yaña belgeçleklär dä sınatmıy ikän. Äytik, Qazannıñ texnik universitetınıñ eşçelär belän idärä itü fakul''tetına ber urınğa 41 keşe däğwä itsä, mädäniät häm sänğät universitetındağı säyäsät şirkätläre belän idärä itü belgeçlegendä 21 keşe. Ber yıl elek 3 yuğarı uqu yortın quşıp yasağan Tatar däwlät xumanitar-pedagogiqa universitetında bügenge köndä byudjet urınnarı yözgä kimede. Häm älege uqu yortında iñ zur bäyge - tärcemäçelärne äzerläwçe bülegendä. Anda - ber urınğa 15 keşe.
Düşämbedä isä mäktäpne tämamlawçılar uqu yortlarına kerer öçen imtixannar birä başladı. Qazannıñ yuğarı uqu yortlarında berençe imtixannarın tapşırğan Gölnaz Asılgäräyeva häm cäyge yalları waqıtında balasın uqırğa kertep yörgän änise üzlärneñ xis- toyğıları belän “Azatlıq” radiosı belän dä urtaqlaştılar. Äydägez alarnıñ üzlären tıñlap qarıyq.
“ - Min üzem çittän – Başqortstannan kildem. Tatar telen öyränügä telägem bulğanğa min Qazan däwlät universitetınıñ tatar tele häm tarix fakul''tetına kerergä buldım. Alğa taba minem 4 imtixan tapşırası bar. Awıldan kilgän balalar bulğaç, bezneñ äzerlek älläni tügel häm şähärlärnekenä citmi torğandır. Şunlıqtan Xodayğa yalwarıp uqırğa kersäk yarar ide dip torabız.
- Alar ğına tügel bez dä balalar belän bergä imtixan biräbez, alar öçen borçılıp torabız. Qayğırabız.”
Şunı da äytergä kiräk, bıyılğı uqu yılında yuğarı uqu yortına kerergä telägän çığarılış sıynıf uquçıları Berdäm däwlät häm respublika imtixannarın mäktäptä ük birep çığarğa tieş ide. Ä menä şul waqıtta awırıp imtixan birä almağan yäki bu waqıtta şähärdä bulmağan uquçılar öçen düşämbedän Berdäm däwlät häm respublika imtixannarınıñ «ikençe dulqınını» başlanıp kitte. Tatarstanda ikençe dulqın belän yaqınça 4 meñ keşe imtixan tapşıraçaq ikän. Düşämbedä älege imtixannar matematikadan ütkän bulsa, 20 iyüldä - Rus telennän, biologiädän - 24 se könne, tatar tele häm fizikadan - 26 iyüldä, ximiädän 28 iyüldä ütäçäk.
Gölnaz Şäyxetdin
