Şuşı könnärdä Qazan zooparkına Almaniäneñ Berlin zooparkınıñ citäkçeläre kilep kitte. Alar ike kön buyı Qazan xaywannar baqçasın qaradılar. Qunaqlar: “Mondağı xaywan, üsemlek törläre bik küp, bu unikal' küreneş, tik Qazan zooparkınıñ mäydanı keçkenä häm şähär idäräse aqçanı azraq bülep birä buğay”- digännär.
Qazan zooparkı bıyıl üzeneñ 200 yıllıq yubileen bilgeläp ütä. Ul Yevropada iñ borınğı xaywannar-üsemleklär tuplanğan baqçalarnıñ berse. Aña 1806 yılda nigez salınğan. Xäzerge citäkçese Al’bert Mödärrisew. Berlin zooparkınıñ başlığı Bernxard Blaskovitsnı häm anıñ urınbasarı Klaus Polenı Al’bert Mödärrisew zoopark belän tanıştırıp yörde, annan qunaqlar üzläre genä 7 gektarğa yaqın zooparknı äylänep yördelär, fotoğa töşerdelär, aq ayu balaları alarğa bigräk oşadı buğay, ozaq qarap tordılar. Alar Qazanğa, Qazan zooparkına berençe tapqır kilülärenä bik şat idelär.
Almaniädän kilgän qunaqlar arasında ul ğına rus telendä söyläşä, qalğannarı isänläşä häm sawbullaşa ğına ala. 200 yıllıq Qazan zooparkqa kilgändä, anda 700 törgä yaqın üsemlek, 150 tör cänlek bar. Şulardan 60 tör üsemlek häm 14 cänlek xalıqara Qızıl kitapqa kertelgän. Qazan zooparkın pitomnik dip tä äytergä bula, monda üsemlek-xayvannarnıñ siräk oçrıy torğannarın ürçetälär. Tik zooparknıñ üzendä genä älläni üseş, üzgäreş yuq di anda eşläwçe apalar. Berniçä yıl elek niçek yäşäsä xäzerdä şulay ikän. Citäkçeläre häm anıñ tiräsendä eşläwçelär kübese tatarlar bulsa da tatarça söyläş belmilär bulıp çıqtı. Cäy aylarında üsemlek-cänleklärne qararğa kilüçelär cäy xäyran kürenä. Qışın az inde dip aqrın ğına äytep quydı kilgän kitkän keşelärne küzätüçe zoopark apaları. Bilet bäyälärenä kilgändä, düşämbe zurlarğa 100 sum, balalarğa 50сум, 3 yäşkä qädär bulğan balalarğa kerü buşlay. Sişämbe balalarğa 25, zurlarğa 50, çärşämbe ölkännärgä 110 sum. Qalğan könnärne dä bäyälär şul tirädä tirbälä. Almaniädän kilgän qunaqlarğa qaytsaq, alarnıñ cänleklär belän tanışıp betergännären köttek tä, zooparkta ütkän ekskursiädän soñ tuğan fikerläre belän tanışırğa buldıq. Berlinnan zooparkınıñ citäkçe urınbasarı Klaus Pole bezgä menä närsälär söyläde:
- Bezneñ zoopark belän sezneñ zooparknıñ iñ zur ayırması mäydan. Bez aña tizräk mäydan aluın telibez. Älbättä moña aqça kiräk, min şähär idäräse finans yaqtan qayğırtır dip ışanam. Mäsälän Berlindağı bezneñ zooparknıñ mäydanı 160 gektar, ä monda 7 gektar. 7 gektarlı zoopark Qazan kebek millionlı şähärgä bik az.
Röstäm İsxaqi
