Cäy buluğa da qaramastan, Qazanda bu ölkädä qızıqlı çaralar küp kenä uzıp tora. Bu Tatarstanda 2006 yıl ädäbiät häm sänğät yılı dip iğlan itelü belän dä bäyleder. Niçek kenä bulmasın, härkönne diärlek respublikada kürgäzmälär açıla, konsertlar, gastrol’lär uza. Bıyıl bilgeläp üteläçäk tatar teatrınıñ 100 yıllıq yubileyına da äzerlek qızıp kilä. Xäzer bez sezgä respublika mädäni tormışınıñ soñğı yañalıqları belän yaqınnanraq tanışıp kitärgä täqdim itäbez.
Avgust başında G.Qamal isemendäge akademiä teatrı Londonğa gastrol'lärgä çaqıru aldı. Oktäber ayında teatr Böekbritanieneñ "Riversayd Studios" säxnäsendä altı kön Zölfät Xäkimneñ "Telsez küke" häm Rawil Boharayıvnıñ "Timer borçaq" spektakl'lären kürsätäçäk. Şunı da äytergä kiräk, "Riversayd Studios" wäkile Qazanğa kilep, ingliz tamaşaçısı öçen Qamal repertuarındağı äsärlärne üze saylap alğan. Teatr yaña 101-nçe sezonnı Londonnan qaytqaç, 13 oktäberdä Qazannıñ Kaçalov isemendäge rus teatrı säxnäsendä “Zäñgär şäl” belän açaçaq dip kötelä. Çönki xäzerge waqıtta Qamal säxnäsendä remont eşläre bara häm ul dekaber ayında ğına tämamlanaçaq. Qamal teatrı artistları cäyge yallardan 7 avgust könne çığıp, yaña sezonnıñ bulaçaq premyeraları östendä eşli başladı. Yıldağıça teatrnıñ elekkege baş rejisserı Marsel' Sälimcanovnıñ tuğan köne uñayınnan 7 noyäberdä säxnädä yaña spektakl' quyılaçaq. Ul - Tufan Miñnullinnıñ uzğan "Yaña tatar p'yesası" bäygesendä ciñgän "Altı qızğa ber kiäw" äsäre.
İkençe premyera G.Qamal teatrı säxnäsendä dekaberdä, Tatar teatrınıñ 100 yıllığına bağışlanğan bäyräm atnalığında uzaçaq. Anda Näqi İsänbätneñ "Gölcamal" äsäre kürsäteläçäk.
Uzğan yılğı premyera - Çexovnıñ "Öç señel" spektaklen qamallılar bıyıl sentyar'dä Ufada "Tuğanlıq" teatr festivalenä alıp baraçaq. Xäzerge waqıtta Sankt-Peterburgtan kilgän rässam Yevgeniy Ganzburg "Öç señel" öçen utlar quyılışın yañaça eşli. Tağın şunı da äytergä kiräk, Ufağa kitkänçe qamallılar Almatada bulıp qaytaçaq. Alar anda I Xalıqara Üzäk Aziä illäre teatrları festivalendä qatnaşır dip kötelä. Monda tamaşaçı xozurına Näqi İsänbätneñ "Cirän çiçän belän Qaraçäçsılu" spektakle kürsäteläçäk.
Şulay uq Qazannıñ Kärim Tinçurin isemendäge teatrı yaña 74-nçe sezonın üzeneñ säxnäsendä aça almayaçaq. Monda da, dekabergä qädär teatrnıñ binasında zur remont eşläre baraçaq. Biredä diwarlar, tamaşa zalı, säxnä, binanıñ tışqı tirä-yağı tözekländereläçäk.
Yaña sezon çit säxnädä noyäber ayında, Danil Salixovnıñ "Tanışu-qawışu teatrı"belän açarğa niätli. Dekaberdä isä yañartılğan binada akterlar Tatar teatrınıñ 100 yıllığına bağışlanğan tantanalı kiçä täqdim itäçäk. Teatr binasında pır tuzıp remont eşläre barsa, artistları isä Törkiäneñ III Xalıqara İstanbul teatr festivalendä qatnaşırğa dip kitte. Tinçurinlılar Törkiä tamaşaçısına Mirsäy Ämir äsäre buyınça quyılğan "Gölşayan" spektaklen täqdim itä. Spektakl' tatar milli ğöref-ğadätlärenä, fol'klor traditsiälärenä, cır-iyüllärgä bay.
Däwam itäbez, Tatarstan milli muzeynıñ citäkçese bulğan Gennadi Muxanov respublikadan küçenüe säbäple eşennän kitte. İke distä yıldan artıq şuşı urında eşlägän Gennadi Stepanoviç muzey cämäğätçelegenä bilgele şäxes. Xäzer isä respublikanıñ milli muzey citäkçese Gölçäçäk Näcipova bulaçaq. Moñarçı Gölçäçäk Näcipova milli muzeynıñ fän buyınça direktor urınbasarı bulıp eşlägän. Şulay uq ul Qazan häm İdel-Ural töbägeneñ mädäni tormış tarixı, xäzerge muzey eşçänlegenä bağışlanğan illedän artıq mäqälä häm berniçä kitap avtorı da.
Şulay uq düşämbe kiçendä Qazanda Salawat Fätxetdinov konsertları başlanıp kitte. Salawat, berençe konsert general' repetitsiä inde ul, disä dä, tamaşaçı qänäğät qalğan. Teatral'läşterelgän tamaşada Şüräle belän cırçı bäxästä, ber- bersenä törtmäle süzlär dä äytelä, tormış-yäşäyeş xaqında añlaşu da bara. Yädkär Xäbibullin başqaruındağı şüräle konsertnıñ berençe bülegendä Salawat belän urmanda bula, ikençe bülektä ul cırçı belän bügenge Qazanğa kilä. Metro tözeleşe, keşelärneñ mönäsäbäte, tabiğät'kä, tarixqa qaraşlar belän tanışa. Keşelär yaman, alar minem barmağımnı qıstırğan Bıltırdan mäkerleräk dip sanıy Şüräle. Şüräle şağir Tuqayğa da ränci ikän. Poemasında üze yaratqan su anası belän qawıştırmıyça, mäñge yalğız yäşäwgä duçar itelgän Şüräle şähärne taşlap urmanğa kerep kitä imeş. Älege teatral'läşterelgän tamaşağa estrada Salawatnıñ xalıqçan cırları kilep quşılu tamaşaçılar küñelenä xuş kilgän. Ä kemneñ zäwığı başqaçaraq ul klassik vokal yäki simfonik muzıka konsertlarına bara ala. Közge sezon açılırğa küp qalmadı.
Gölnaz Şäyxetdin
