Respublikanıñ ministrlar kabinetında xökümät başlığınıñ berençe urınbasarı Rawil Moratov qatnaşında formal' bulmağan eş bazarın köyläw häm keremnärne räsmiläşterü komissiäse utırışı uzğannan soñ “İzvestiä Tatarstana” gazetası “Uyın avtomatlarına matäm köye uynıylar” dip yazıp çıqtı. Ul şaytan uyınçıqlarına matäm köye uynawğa kitergän säbäplärneñ berse - uyın biznesınıñ küp kenä wäkilläre salımnarnı waqıtında tülämäwläre. Tatarstannıñ salım xezmäte citäkçese urınbasarı Leonid Yäqunin uyın avtomatların totuçılar inkassatsiä xezmätennän baş tartalar, eş xaqın az tülilär yäki az dip kürsätälär di. Salım xezmäte wäkile qabatlap ütkänçä, bolar barısı da qaralğan taläplärne bozu oçraqları. Alarğa qarşı çaralarnıñ kürelgäne yuq ikän äle. İsegezgä töşerep ütäbez “Uyın avtomatların respublika cirlegendä urnaştıru” qanunı buyınça 2007 yılnıñ 1 ğinwarına qädär barlıq uyın uynaw poçmaqları, klubları “Qazan” xalıqara at sportı kompleksına häm Qama Alanına küçep betärgä tieş. Läkin xäyran ğına uyın biznesı cene küçkän säwdägärlärneñ bu qanunnı ütiseläre kilmi ikän. Qazan başqarma komitetı citäkçeseneñ berençe urınbasarı Röstäm Niğmätullin süzlärenä qolaq salsaq, älegä başqalada terkälgän 176 uyın oyışmasınıñ 3se genä “Qazan” ippodromı cirlegenä küçärgä teläk beldergän. Axır çiktä, qarşı kilüçelär üzläreneñ uyın klubların yabırğa tieş bulaçaqlar. Xalıqnıñ soñğı tienennän qorı qaldıruçı uyın avtomatlarınıñ qanunğa buysınmawçı başlıqları Çallı, Alabuğa, Tübän Qama, Älmät, Bögelmä, Yäşel Üzän häm başqa şähärlärendä dä tabılğan. Respublikanıñ 29 munitsipal' berämlegendä genä uyın avtomatları üzläreneñ eşçänlegen tuqtatqannar.
Respublika xökümät başlığı urınbasarı Rawil Moratov utırışta qatnaşuçılarğa uyın biznesında tärtip urnaştırunı taläp itkän. “Uyın ölkäsendä 225 salım tüläwçeneñ 27se genä tege bez aldan äytep kitkän inkassatsiä xezmätennän faydalana, qalğannarı “qara kanal” belän eşlägännär bulıp çığa tügelme soñ bu dip tä basım yasıy” - xökümät başlığı urınbasarı. Uyın oyışmalarınıñ 60 protsentında qağidälär bozu oçraqları buluın da äytep kittelär. 20 avgustqa qädär Tatarstandağı barlıq uyın oyışmaları isemlege tözeläçäk. İsemlektä här oyışmanıñ qanunda qaralğan küçü grafikları kürsäteläçäk. Qazan xalqınıñ yort qarşında uyın avtomatı klubı torsa ul isemlekkä kergäç, anıñ qayçan yuqqa çığasın da belep bulaçaq. İsemlekkä kermägän, tieşle urınnarğa küçergä telämäwçelärgä administrativ çaralar küreläçäk dip tä qurqıta uyın säwdägärlären xökümät başlığı urınbasarı. Kiläçäktä uyın uynatuçı, xalıqnıñ başın äyländergän uyın säwdäse başlıqları tabışnı inkassatsiä turında mäcbüri räweştä kileşü tözergä tieş. Häm şundıy şartlarda ğına Tatarstan xökümäte uyın oyışmaları belän äñgämä alıp barırğa riza bulaçaq. “Uyın avtomatların iärläwçelärne ügetläw waqıtı ütte, aktiv eşläw çorı citte!”- di Tatarstan xökümäte wäkilläre.
Röstäm İsxaqi
