Avtonomiä qorıltayında yañğırağan “Bezneñ öçen iñ möhime – xakimiät büleşü tügel, ä kiçekmästän mäktäp binasın tözekländerü kebek süzlär näticäle bulıp çıqtı. Baytaq baylarıbız remontqa üz öleşlären kerttelär: kem aqçalata, kem tözeleş materialları yäki eşçe qulları belän...
Şunlıqtan remontnı cirenä citkerä almawnıñ mäktäp açuğa kirtä buluı ixtimalı yuqqa çıqtı, şöker... Läkin kötmägändä annan da qatıraq kirtä päyda buldı. Moña qädär “mäktäp az komplektlı sıyfatında täpiläp kitäçäk, yıl däwamında anıñ ürnäk bulırlıq itep eşläwe başqa äti-änilärne dä qızıqsındırır – kiläse yılda balalar cıyu qıyın bulmas”, - dip ömetlängän ide tatar cämäğätçelege. Bu turıda gubernatornıñ maxsus qararı da bäyän itelgän, anda aqça mäs’äläsen çişü sannarı da kiterelgän ide. Gubernatornıñ mäğärif türäläre häm tatar cämäğätçelege belän oçraşuında mondıy ömetlär nıq qaqşadı: Sergey İvanoviç, elekke qararına qarşı kilep, här sıynıfta 25 baladan da kim bulmasqa tieş, digän taläp quydı.Ul başta remont eşläre belän tanıştı, maqtap ta aldı. Ä yaña taläplär quyuı kötmägändä salqın su sipkändäy kilep çıqtı.
Başqa mäktäplärne uquçılar az bulu säbäple yapqan waqıtta, bulaçaq mäktäpneñ az komplektlı buluın başqalarğa añlatu bik qıyın bulaçaq, häm monı añlamaslar da. Şunlıqtan här sıynıfta 25 baladan da kim bulmasqa tieş.
Mäğärif ministrı Tamara Dewyätkina da, aqça mäs’äläsen xäl itü turındağı elekke qararnı yuqqa çığarıp, gubernator süzlären matdi yaqtan nigezläde.
Här balanı uqıtu yılına 22 meñgä töşäçäk, ä ğadi mäktäplärdä – nibarı 7 meñ genä. Kem birer soñ bu qädär aqçanı?, dide ul
“Tuğan tel” oyışması wäkilläre, Morozovnıñ Dimitrovgrad mäktäben açu turındağı prikazınıñ fevral'dä ük xalıq aldında iğlan itüe öçen räxmätlär äytep, bu oçraqta qararnıñ bik tä soñ, barlıq mäktäplärdä dä uquçılar tuplanıp betkäç, iyünneñ 14ендә qabul itelüe säbäplären soradılar. Läkin cawap bulmadı. Direktor bulıp bilgelängän Älfiä Abutdinova da 25 bala cıyunıñ qıyın bulaçağına, başqa mäktäplär direktorlarınıñ qarşı eş alıp barularına basım yasadı. Sergey İvanoviç ta beraz yomşara töşte:
Tırışırğa kiräk, härxäldä, 220 baladan da kim bulsa, açıp bulmas. Yarıy, 200 cıyılsa da uylap qararğa bula äle. Ä inde 100 genä bulsa – bu turıdağı tırışlıqlar üzlären aqlamayaçaq. Nereal'no, dide ul.
Häm bu eştä bergäläp totınırğa kiräklegen dä östäde ul. Çaralar da bilgelände. Mäsälän, gubernator häm şähär başlığı Sergey Yermakov isemennän xalıqqa möräcäğät tekstın äzerlärgä quştı. Anda bulaçaq mäktäpneñ barlıq östenlekläre yaqtırtılırğa tieş. Möräcäğät televizor aşa bäyän iteläçäk, gäzitlärdä dä basılaçaq. Barlıq mäğlümat çaraları aşa da reklamanı köçäytergä kiräk. Remont betkäç, ata-analar öçen açıq işeklär köne uzdırırğa da buldılar. Utırışta şulay uq uqu bülmälären cihazlaw, yaña mebel' alu, Qazannıñ yärdäme turında da süz buldı. Tatar kongressınıñ zur tayanıçı bulğan “Qazan” ansambleneñ “Ruslan” isemle mädäniät yortında xäyriä konsertı biräçägenä Sergey Morozov ta qanäğätlek belderde.
Oçraşu ğibrätle tämamlandı. Sergey Morozov, tınıçlandırğanday, bergä totınsaq, bu eşne ciñep çığaçaqbız, ällä ni qurqırğa da yaramıy, ciñ sızğanıp eşlise genä qala, dide. Şulay da “nilektän soñ mäktäp açu turındağı qarar bik tä soñ qabul itelde?” digän sorawğa cawap bulmağanğa, anı yänä ber märtäbä qabatlaw, utırışta qatnaşuçılarnıñ teläktäşle canlanuına da säbäp buldı.
Kitkändä Sergey Morozovtan “oçraşu näticäläre belän qänäğätme?” dip sorarğa da forsat tabıldı. Qänäğät, dide ul. Bergäläp totınsaq, yırıp çığarbız bu eşne, dip tä östäde.
Ul şul uq könne tar dairädä ike möfti belän dä oçraşıp söyläşte. Äñgämäneñ eçtälege turında ällä ni baş watası yuqtır. Elek tä alar öçäwläp kenä utırıp söyläşkännär ide. Anda süz ike möftineñ dä üz urınnarınnan kitärgä rizalıq birüe oçrağında, çittän başqa keşene çaqırıp, ölkä möselmannarınıñ berläşüen tä'min itü turında barğan ide. Läkin ul waqıtta, Fatıyx xäzrät riza bulğan, ä Säwbän xäzrät telämägän, digän süz işetelgän ide soñraq. Bu yulı isä şul uq temağa avtonomiä qorıltayında yañğırağan ğozerne iskä alıptır inde, gubernator şul uq temağa süz alıp barğandır, dip farazlarğa ğına bula. Çönki utırışta qatnaşqannar berkemgä dä mäğlümat birmäskä kileşkännär. Barı tik oçraşu faktı ğına ser tügel.
Ayrat İbrahim, Sember
