Respublikanıñ ekologiä häm tabiğät baylıqların saqlaw ministrlığı 2-3 atna elek su buyındağı munçalarnı sanap yörgän ide. Ul yörüläre näticäsez bulmadı, Yuğarı Oslan rayonı xalqına munçalarığıznı Zöya yılğası buyınnan başqa cirgä küçeregez dip xafağa salıp kittelär. “Azatlıq” radiosına şul ministrlıqnıñ wäkile Damir Wälullin:
- Zöya yılğası buyındağı munçalarnıñ tieşsez urnaşqannarı açıqlandı. Mäһkämä qararı näticäsendä munça xucaları 15 sentäbergä xätle munçaların sütärgä, başqa urınğa tözergä tieşlär. Bezneñ inspektorlarnıñ mäğlümatları buyınça 5 munça sütelerä, çönki bu yılğağa zıyan kiterä!
- digän ide.
Bu könnärdä tabiğätne saqlaw oyışmaları Qazanda tağın ber qanun bozu oçrağın tapqannar. Qazan rayonara tabiğätne saqlaw prokuraturası “Elgra” cawaplılığı çiklängän şirkätkä qarşı cinayät eşe quzğatqan.
Bu şirkät tieşsez cirdä, Qazansu yılğasınıñ su saqlaw zonasında sport binası – Köräş sarayı tözep yata ikän. Bu xaqta “Azatlıq” radiosına tulıraq itep Qazannıñ rayonara tabiğätne saqlaw prokurorı yärdämçese Rämil Äxmätcanov menä närsälär söyläde:
- “Elgra” cawaplılığı çiklängän şirkäte eşçeläre Qazansu yılğasınıñ su saqlaw zonasında Ämirxan uramında firma citäkçelege häm şähär xakimiäte arasında teldän kileşüne buyınça qorılma tözi başlağan. “Elgra” Köräş sarayın cir öçen dokumentlar häm tözeleş proyektı bulmağan kileş tözi. Östäwenä, şirkätneñ däwlät ekologiä ekspertizasınnan uñay näticäse dä yuq. Älege oçraq buyınça “Elgra” şirkätenä mönäsäbätle administrativ xoquq bozu turında proizvodstvo quzğatılğan. “Tik predpriätie tözeleşne tuqtatu turındağı prokuratura taläben cawapsız qaldırdı. Bu xäl sudqa eşlärne mäcbüri tuqtatu turında däğwä ğarizası täqdim itär öçen nigez buldı. Xäzerge waqıtta däğwä sudta tikşerelü stadiäsendä.
Qanun buyınça tözelergä tieşle binanıñ proyektı däwlät ekologiä ekspertizasın ütärgä tieş ikän. Ul binanı däwlät tözergä quşqanmı, ällä şäxsi keşelär tözime ansı möhim tügel di tabiğätne saqlaw prokuraturası. Ägär tözüçe oyışmada ekologiä ekspertizası näticäse, röxsäte yuq ikän, ul oyışmağa bötenläy bina tözergä yaramıy bulıp çığa. Läkin bu oçraqta xäl başqaçaraq, respublikada kiläçäktä sport üseşen arttırırğa tieşle Köräş sarayı Qazansu yılğası buyında tözelä başlağan inde. Tabiğätne saqlaw prokuraturası da üz eşen eşlägän. Xäzer sud näticälären kötäse qala dip däwam itte süzen Rämil Äxmätcanov:
- 24 avgustta mäһkämä bulaçaq. Anda inde älege sport sarayınıñ yazmışı xäl iteläçäk. Älegä tögäl berni äytep bulmıy, barı farazlar ğına.
Mäһkämä tabiğät ana faydasına bulırmı ällä “Elgra” şirkäte faydasınamı? – älegä bu cawapsız soraw. Xäyer kötärgä küp qalmadı, barı berniçä kön…
Röstäm İsxaqi
