Bıyıl cäyen Samarada zurlap karnaval uzdırıldı. Yözlägän kostyum, irlär, xatınnar, qızlar, yegetlär, bala- çağa. Nindi genä mögez quymağannar da, nindi genä qoyrıq taqmağannar üzlärenä.. Ğomumän, xaywanlaştırılmağan adämi zatlarnıñ paradı buldı. Menä şul çuarlıqta cide sılu qıznıñ borınğı rus, tatar baybiçälärneñ kiemnären kürsätü üzenä ber samimilek häm saflıq bulıp qabul itelde. Ä kostyum, külmäklärne üz qulı belän Nailä xanım Nasretdinova tekkän. Külmäklärneñ bizägen dä, bizänü çaraların da, materiäsen dä Nailä xanım üze barlağan, ä inde külmägenä qarap qına şul külmäklärne kiep xalıq aldına çığarğa qızlarnı üze ezläp tapqan.
Nailä xanım, karnaval zur äkiäti dönyanı xäterlätte, Sezneñ dä milli külmäk- kostyumnarıgız bügenge yäşlär öçen äkiäti dönya. Zur karnavalda Sezneñ yünäleşne qabatlawçı buldımı?
Karnavalda minekedäy kostyumnar bulmadı. Min yäşlärgä borınğı külmäklärneñ maturlığın kürsätäsem kilde. Närsä inde, kemne genä alma, irme ul, xatın- qızmı – şärälek! Min atalap rus- tatar külmäklärenä tuqtaldım, çönki Rusiäneñ nigezen şul ike millät täşkil itä, tatarlar da ruslar belän bergä Rossiä däwlätçelegen tözegän millät, menä şul ike xalıqnıñ duslığına qarap, Rusiädä totrıqlıqnı bilgeläp bula. Tösle, äkiäti, borınğı külmäklärne yäş, çibär, külmäklär ruxına turı kilgän qızlarnı taba aldım.
Min çit illärdä bulam. Menä Litvada yılına 4 märtäbä barça xalıq milli kiemnären kiälär. Qarap tuymaslıq maturlıq. Böten şähär cırlıy- bii. Bernindi pärilek- cenlek yuq. Samaradağı karnavallarnı şul yünäleştä cibäräse ide. Keşelär üz tamırların yışraq islärenä töşerergä tieşlär. Çın maturlıq şunda, şunda tözek ädäpneñ başı.
Nailä xanım, jyurigä kemnär kerde häm Sezneñ kostyumnar maqtawlılar isemlegenä elägä aldılarmı?
Min icat itkän külmäklär 2- urınnı aldılar. Ällä keşelär xıyalğa çamalı, ällä min añlamıym. Menä qatırğı tartmağa başların tığıp yörüçelärne min karnaval kostyumı dip sanamas idem.
Nailä xanım, şulay da millionlı şähärdä 2- nçe urın naçar tügelder inde?
Niçek kenä äle. 500 kostyum arasında 2-nçe urınnı alu, älbättä, quanıç. Bu minem zur karnavalda 1- qatnaşuım häm täcribä tuplawım. Bik qänäğätmen. Qızlarım da şatlar. Räxmät qızlarğa. Esse hawada altı säğät buyına borınğı külmäklärdä yörü- ciñel eş tügel. Min karnavaldan därtlänep qayttım häm tağın da, tağın da icat itäsem kilä.
Karnavalda minem kostyumnarğa xalıq soqlanıp qaradı. Menä şul küzlär mindä yaña ömet wä därt uyattılar.
Şamil Bahautdin, Samar
