Respublikanıñ Däwlät Şurası deputatları 12 oktäberdä çirattağı sessiägä cıyıldı. Älege sessiäneñ ber üzençälege dä bar. Deputatlar pänceşämbe könne tözekländerelgän, yaña utırışlar zalında cıyıldı. Alarnı qotlarğa häm respublika parlamentın qararğa Mintimer Şäymiev tä kilde. Älege sessiä utırışınıñ kön tärtibendä 80gä yaqın mäs’älä. Läkin alarnıñ iñ töbe, inde xäbär itkänebezçä, Tatarstannıñ 2007 yılğa byudjetın berençe uqılışta tikşerü. Ğädättägeçä, fikerläşülär, bäxäslär, tege yä bu tarmaqqa aqçanı kübräk bülep birüne taläp itülär buldı utırışta. Häm ğädättägeçä, sessiäneñ barışın radio aşa tıñlarğa mömkin buldı. Alay ğına da tügel, bu yulı berençe märtäbä deputatlarnıñ cıyılışın İnternet aşa da qararğa mömkin ide. Teläwçelär öçen Däwlät Şurası säxifäsendä sessiädän turı translyatsiä alıp barıldı. Bu eş respublika parlamentına küpmegä töşkänder – bilgesez. Ä menä respublika deputatların üzläreneñ eşlären başqarğanda internet aşa kürergä teläwçe qazanlığa älege mömkinlek öçen säğätenä 400 tiräse sum tülärgä kiräk buldı. Citmäsä, räsemneñ sıyfatı da iskitärlek tügel bu bäyägä. Alay da, respublika xakimiätlärneñ üzläreneñ eşçänlegendä zamança texnologiälärne qullana başlawı şaqtıy qızıqlı.
Respublika parlamentı byudjet häm başqa şundıy mäs’älälär belän mäşğül arada, Qazanıñ yuğarı uqu yortları studentları Tatarstan xökümätenä xat yullağan. Alar anda citäkçelärdän uyın avtomatların, uyın biznesı salonnarın şähär uramnarınnan alunı taläp itälär. Uyın biznesı xäzerge zamannıñ bäläse, ul yäşlärgä cinayätçelekkä yul aça, dip yazıla yäşlärneñ Rawil Moratovqa yullanğan möräcäğätendä. 12 oktäberdä älege xat respublika xökümätenä barıp ireşte, dip xäbär itä Tatar-inform agentlığı.
Gölnaz İlgizär
