“Самарское обозрение ” gäcitäse qalın, tösle, yaltırawıq häm baylar uqıy torğan gäcitä, waqiğalarğa qaynar sulış birep toruçı basma. Samar töbägendä dä kriminal törkemnär arasında gruzinnarnı çüplilär.
“Самарское обозрение” yazuınça, ataqlı qaraq Roland Gegeçkorinıñ bratı Raul' Gegeçkori qulğa alınğan. 43 yäşlek Rawl'da narkotiklar tapqannar, häm ul eçke eşlär idaräseneñ eşlärendä “wor v zakone”, häm kriminal avtoritet däräcäsendä terkälgän. Bu ike terminnı tatarçalap äytsäk, Raul' Gegeçkori – Samarnıñ “ata banditı” bulğan, öç bala atası.
Samar ölkäseneñ Cigulevsk şähärendä Gospodze Tengizi qulğa alınğan. Gospodze da ”ata banditlar” isemlegendä bulğan. Gospodze belän tağın dürt ir qulğa töşkän. Qoral tabılğan, şul uq narkotiklar.
Tol'yatti şähärendä Gvaraliä Teymuri – militsiä qulında. Teymurinı äle Gruziä üze ük tä ezli ikän. Tol'yattida Anzor Xutsişvili da totılğan. 68 yäşlek Anzor da qoralğa iä.
Gäcitä yazuınça, ölkädä gruzinnar totqan barlıq firmalar eçke eşlär idäräse tarafınnan centekläp tikşerelä.
““Самарское обозрение” distälägän gruzin millätennän bulğan ata banditlarnıñ isemlegen urnaştırğan. Alar Samar ölkäsenä uzğan ğasırnıñ 90- nçı yıllarında kilgän bulğannar.
Gäcitä yazuınça, bügenge köndä gruzin millätennän bulğan “ata banditlar” kazinolarnı, narkotik, araqı biznesın qulda totalar häm keşelär urlaw, maşina urlaw da alar hönäre ikän.
Süz uñayınnan şunı östärgä bula, Samardağı gruzin milli- mädäni üzäge üzeneñ 15 yıllığın uzdırırğa äzerlängän ide. Ütkärmädelär.
Şamil Bahautdin, Samar
