2006 yılnıñ 1 noyäberendä tönge säğät 2dä Tatarstan-Yaña ğasır teleradiokanalınıñ efirğa çığu yışlığı üzgärä. Älege üzgäreş kanalğa yışlıqlarnı birüçe Kosmiçeskaya svyaz’ federal’ däwlät unitar şirkäteneñ taläpläre belän bäyle. Xäzer yaña ğasırnı niçek qarıybız inde, dip aptıraşqa qaluçılar öçen bez älege eşneñ niçek baruı, televizor qarawçılar häm radio tıñlawçılarğa almaşunıñ niçek tä’sir itüe turında telekompaniä wäkilläreneñ añlatmasın alırğa buldıq.
Azatlıq radiosı tıñlawçılarına yışlıqnı alıştıru ğämälläre turında Yaña ğasır teleradiokompaniäseneñ texnik direktor urınbasarı Vladimir Safronov söyläde. Bezneñ älege almaştıru eşläre ğadi tıñlawçığa yäki qarawçığa qağılamı digän sorawğa ul menä niçek cawap birde.
Yışlıqnı almaştıru tıñlawçılar öçen şunı ğına añlata, bezneñ kanalnı iärçen aşa ayırım qabul itü komplektı yärdämendä totqan keşe cihazlarnı yañaça köylärgä tieş. Döresräge, anıñ ber genä kürsätkeçen – qabul itü yışlığın. Qalğan texnik parametrlar barısı da iskeçä qala. Bezne ğadi radio häm televizor aşa qarawçılar häm tıñlawçılar isä bernärsä dä eşlärgä tieş tügel, alar bezne niçek tıñlağan, qarağan, xäzer dä şulay uq bulaçaq. Annarı yışlıqlarnı almaştıru bezneñ telekompaniäneñ iärçennän alğan signalın retranslyatsiäläw belän şöğellänüçe operatorlarğa da qağıla. Alar da üzläreneñ qabul itü cihazlarınıñ kürsätkeçlären üzgärtergä tieş bulaçaq. Bezneñ signalnı taratuçı, retranslyatsiäläwçe kabel’ kanalları, operatorlar üzläreneñ tyunerların üzgärtäçäk tä, yaña ğasırnı iskeçä qarap bulaçaq, bezneñ signal tele häm radioalğıçlarğa elekkeçä kilep toraçaqVladimir Safronov süzlärenä qarağanda, Yaña ğasır teleradiokompaniäseneñ signalların taratuçı iärçen stansiälären tatarstan buyınça aldan planlaştırılğança küçeräçäklär. Şuşı säbäptän, 1,2,3 noyäber könnärendä respublikanıñ qayber awıl, rayonnarında Yaña ğasırnı qabul itüdä törle totqarlıq oçraqları bulırğa mömkin ikän. Läkin bu waqıtlı ğına, küçeş waqıtı küreneşe bulaçaq, dilär kompaniäneñ texnik xezmäte wäkilläre. Çittäge retranslyatsiä eşläre belän şöğellänüçe şirkätlärgä isä üzgäreşlär turında mäğlümät aldan uq cibärelgän, alar köyläw eşlären inde alıp baralar ikän.
Rusiä töbäklärendä häm çit illärdä Yaña ğasırnı iärçen aşa ayırım qabul itü komplektı yärdämendä qarağan keşelär isä, inde alda äytelgänçä, qabul itü cihazların üzläre köylärgä tieş bulaçaq. Alarnı köyläw kürsätkeçläre kompaniäneñ säxifäsendä tabıp bula, dide Vladimir Safronov.
Bez anardan yışlıqnı almaştıru närsä belän bäyle dip tä soraştıq. Yaña ğasırnıñ texnik direktorı urınbasarı bezgä şundıy cawap birde.
Älege üzgärtü bezgä iärçen aşa üz signallarıbıznı taratırğa yışlıq birgän şirkätneñ taläpläre buyınça eşlänelä. Ul älege ölkädä berüze genä xezmät kürsätä, şuña da üz taläplären quya. Anıñ xezmätläre belän berniçä şirkät qullana. Tağın berär yaña klientları barlıqqa kilgäç, alar şulay yaqın tirädägelärne beraz küçenergä sorıylar. Bu inde berençe genä oçraq tügel. Bıltır oktäber ayında bez ber märtäbä şulay yışlığıbıznı üzgärtkän idek. Xäzer menä tağın şundıy oçraq. Bu, älbättä, uñaysızlıqBu Yaña ğasır kanalınıñ texnik direktorı urınbasarı Vladimir Safronovnıñ teleradiokompaniäneñ yaña yışlıqqa küçüe turında añlatmaları ide.
Gölnaz İlgizär
