Qar tönen dä salmaq qına ğauğaladı. Ä irtän cil köçäyep kitte, yabalaq qar yawuı yulda bökelär dä tudırdı. Şuña da qaramastan, mitingqa baytaq keşe cıyılğan ide. Alarnı ildäge “şabaş”nı beterü öçen oyıştırılğan “russkiy marş” astında “Russkie idut” digän cır belän qarşıladılar
Monısı – yañalıq. Ä şiğär'lär – elekke yıllarnıqınnan ällä ni ayırılmıy.
Satlıqcannar xalıqnı aldadılar
Eşçelärneñ böyek armiäse! Kapitalizmğa “YUQ” dip äyt!
Doloy burjuaznıy stroy, snova Sovetı stroy
Köçebez berdämlektä.
Sotsial' terrornı tuqtatırğa!
Burjuaziäne tonçıqtır, Rossiä xalıqlarına – sotsializm!
Fradkov Xökümäten quarğa!
Häm başqa şundıyraq eçtälekle şiğar'lär. Miting aldınnan KPRFnıñ ölkä başlığı Aleksandr Kruglikov unlap yäş yeget-qızlarğa partbiletlar tapşırdı. Arada tatar qızı İlsöyar Fäizova da bar ide.Ul KPRFqa kerüeneñ maqsatın dönyanı yaxşı yaqqa üzgärtergä, yaxşılıqqa omtıluı belän añlattı. Näq kommunistlarnıñ ana telen mäktäplärdän quıp çığaruı turında ni äytergä belmi, ämma “üzem ana telen berwaqıtta da onıtmayaçaqmın”, dide. Äye, ana telen yaxşı belä. Tatarstanda – Şäymorza awılı mäktäbendä uqığan bit ul.
Ä ölkän yäştäge kommunist, otstavkadağı polkovnik Rawil Xäyrullinnı KPSS ideologiäse üzeneñ ğädellege belän cälep itkän.
Qarlı buran köçäyä barğanğa, qaytıp kitüçelär dä küzgä çalına başladı. Şunlıqtandır inde, miting ta ällä ni ozaqqa suzılmadı. Elekke yıllardan ayırmalı bularaq, xezmät kollektivları wäkilläre çığış yasamadılar – kübräk patriotik şiğırlär uqıldı.
Rezolyutsiäne, ğädättägeçä, Aleksandr Kruglikov üze uqıdı. Annan berniçä özek bolayraq yañğırıy.
Yel'sin-Putin reformaları Rusiä xalıqlarına qarşı revolyutsiä buldı ul. Bügenge xakimiät barı tik cinayätçe oligarxlarga, xalıqara, nigezdä, sionistik kapitalğa xezmät itä. Bez aldardan häm xakimiätkä xezmät itüçe firqälärdän ayırmalı bularaq, privatizatsiä näticälären kire aqtarıp, il baylığın xalıqqa qaytaru yaqlı. Altın aqça häm totrıqlılıq fondların ilgä qaytarunı taläp itäbez. Bez Putinğa häm anıñ yalçı firqälärenä ışanmaw belderäbez. Miting 2-Bötendönya suğışında ciñügä zur öleş kertkän “Svyaşçennaya voyna” (İzge suğış) cırı belän tämamlandı. Monı kommunistlarnıñ da izge suğış iğlan itüläre dip tä añlarğa buladır. Läkin…
Şunısı iğtibarğa layıq: miting tämamlanu belän cil dä tındı, qar da tuqtadı. Bu mitingtan soñ xoquq saqlawçılar törkeme Oblğaz qantarı aldında piketqa cıyıldılar. Säbäbe – Dimitrovgradnıñ NİİARına gaz birüne tuqtatu. Döresräge, kisätep kenä alu. Çönki atom elektrostansası belän alay ällä ni şayarırğa yaramıy. Annan tış 6 ildän qaytarılğan radioaktiv qaldıqlar belän nişlärgä? Häm alarnı util'läşterü öçen Amerika birgän 20 milliard dollar qaya sibelgän?
Piketçılarnıñ taläbe – NİİARğa ğaz birüne çiklämäw. Tik cirle ğaz oyışması da gazğa xuca tügel bit - Gazpromı da Mäskäwdä!
Mondıy wäzğıättä kommunistik çornı sağınıp söyläwçelärneñ ürçüe säbäplären dä añlap buladır.
Ayrat İbrahim, Sember
