Bu könnärdä Yekaterinburg şähäreneñ “RİNGS” sport sarayında Bötendönya tatar kongressı prizlarına häm Ural kubogına tatarça köräş buyınça Bötenrossiä turnirı bulıp uzdı.
Tatarstan respublikası belän Sverdlovski ölkäse arasındağı fizkul'tura häm sport ölkäsendäge üzara xezmättäşlek turındağı Kileşüne ütäw yözennän, Sverdlovski ölkä xökümäte qararı buyınça, Yekaterinburgta Ural kubogına Bötenrossiä köräş turnirı menä inde ikençe märtäbä oyıştırıla. Berençe turnir 2004 nçe yılda uzdırılğan ide. Bu yılğı turnir üzeneñ zur masştablılığı, kiñ geografiäse, çaqırılğan qunaqlarnıñ yuğarı statusı belän ayırılıp tordı. Anı “Tatarstan-Ural” kommersiäle bulmağan partnerlığı, Sverdlovski ölkäseneñ “Köräş” federatsiäse häm Bötendönya tatar kongressı başqarma komitetı ğamälgä quydı.
Milli köräş buyınça köç sınaşırğa dip Tatarstan häm Mari-El respublikalarınnan, Çiläbe, Irınbur, Tomski, Sverdlovski ölkälärennän, Kırgızstan häm Üzbäkstan illärennän batırlar kilgän ide. Komandalar arasınnan berençe urınnı Tatarstan, ikençe urınnı Sverdlovski ölkäse, öçençe urınnı Üzbäkstan sportçıları aldı. Turnirnıñ absolyut batırı bulıp Severoural'ski şähärennän Röstäm Väliullin qaldı.
Turnirnı uzdıruda Qazannan kilgän köräş ostaları häm belgeçlär küp yärdäm kürsättelär. Tatarça köräşneñ Rossiä buyınça Federatsiäse prezidentı Jäwdät Miñnäxmätov bu çaranı oyıştırudağı qayber kimçeleklärgä kürsätte. Yekaterinburgta tatar xalqı küpläp yäşäwgä qaramastan, köräşkä xalıq küp cıyılmağan, köräşçelär sanı da azraq, dide ul.
Cäwdät äfände äytüençä, Rossiä köräş federatsiäse aldağı könnärdä töbäklärdä mondıy eşlärne oyıştırunı kiñräk cäyelderep cibärergä uylıy. “Tatarnıñ tatarlığı üzennän tora, bez üzebez tırışmasaq, berkem dä bezgä yärdäm itmäs, tırışsaq, bulır”, - dide ul.
Şulay da urındağı xökümät citäkçeläreneñ dä, eşmäkär yegetlärneñ dä bu eşkä nıqlap totınuları söyendermäslek xäl tügel, dide Cäwdät Miñnäxmätov. Anıñ äytüençä, biredä kiläse yılğa turnirnı zurraq itep, “master” iseme birerlek itep oyıştırırğa cıyınalar. Bu eşne oyıştıruda bez dä çittä qalmabız dip belderde Cäwdät äfände.
Yekaterinburg şähärendä bulıp uzğan älege sport bäyrämendä “Berdäm Rossiä” säyäsi partiäseneñ cidençe syezdında qatnaşırğa dip kilgän Tatarstan Respublikası prezidentı Mintimer Şäymievnıñ bulıp kitüe yäm östenä yäm östäde häm bäyrämgä kilüçelär küñelendä onıtılmaslıq tä'sirlär qaldırdı.
Fäwiä Safiullina, Yekaterinburg
