Märxümä Wäfirä Ğizzätullina belän Gölzadä Safiullina milli xäräkätneñ berençe adımnarınnan uq anı äydäwçelär rätendä buldılar. Gölzadä, mäsälän, 1990-yılda Tuqay könendä Qamal teatrı qarşında “Tuğan tel” cırınıñ 4-nçe kupletın berençe bulıp yañğıratuı belän ayıruça istä qalğan. Başta 3 kuplet belän çiklängän ide, Batulla yañalıq açtı: “Anıñ bit 4-nçe kupletı da bar”, dide. Cıyılğan xalıq anı şunduq yatladı da, Gölzadağa iärep, kümäk cırğa qatnaştı.
Tik soñğı arada Gölzadä säxnädä kürenmi başladı. 1998-yılda “Tuğan tel” oyışmasınıñ 10 yıllıq yubileen ataqlı bayançı Ramil Quramşin belän nurlandırğannan soñ, Sember säxnälärendä dä bizägäne yuq ide äle. Anıñ belän äñgämä şunıñ säbäpläre turındağı sorawdan başlandı da.
Gölzadä xanım monı yäş talantlarnıñ üsep citüe, konsertlarnıñ bolay da küp buluı, xalıqnı tamaşağa cälep itü xästärläreneñ küplege häm monıñ artınnan yörüneñ mäşäqätle buluı belän añlattı. Qırımda uza torğan “Söembikä varisları” festivaleneñ menä inde öç yıl bulmawı da aqçağa barıp törtelä. Abruylı Xalıqara festival'lär uza torğan Qırımda ayıruça aqça küp taläp itelä. Şöker, dide Gölzadä xanım, bıyıl törle töbäklärdän anı yañartunı sorawçılar işäyue arqasında, BTK da bu mäs’äläne kütärep çıqtı. Allah boyırsa, 2007 iyünendä bu festival' yänä qaytaçaq.
Xäyer, Gölzadä Safiullina eşsez tormıy, döresräge tora da almıy. 10 yıllap elek açqan studiäse eşlären uñışlı ğına däwam itä. Elek ul milli sänğätebezne xalıqqa citkerü yağına basım yasasa, soñğa taba dini kasseta-disklarğa kübräk iğtibar birä: Qor'än täfsire, Päyğambärlär tarixı, Ğaläm tarixı, dini wäğäzlär, kiñ qullanıluçı doğalar, borınğı cırlar… Soñğısın tormışqa aşıru öçen “Rux” isemle maxsus icat törkeme dä oyıştırğan ikän. Qazannıñ 1000 yıllığına bağışlanğan maxsus disklar da çığarğan “Gölzadä” studiäse. Mäsälän, Ayrat Arslanov başqaruında “Şanlı Qazan” tuplanması zur populyarlıq qazanğan. Häm Gölzadäneñ “Közge açı cillärdä” iseme belän täqdim itelgän xalıq cırları tuplanması da.
Änise äytüençä, säxnädä biep üskän Räzidä dä, Gölzadä xanım kebek ük, tiktormas tınğısız can: fän belän dä şöğellänä, kiräk çaqta cırlıy da, 3 bala da üsterä, “Üzebez” isemle Yäşlär xäräkäteneñ liderı da. Gölzadä xanım, şul “Üzebez” belän berlektä, kiläse yılda - xäter könenä “Qaharman cırlar” festivale dä oyıştırmaqçı. Çönki, di Tatarstannıñ Xalıq artistı, Qırım respublikasınıñ atqazanğan sänğät eşleklese Gölzadä Safiullina tarixi mirasıbız ğına bezne saqlap qala alaçaq.
Gölzadä qatnaşlığında uzğan konsertqa qaytsaq, anı yäş talantlı cırçı Röstäm Asaev oyıştırğan. Häm Gölzadäne çaqırıp yalğışmağan da. Çönki iñ oluğ alqışlarğa näq ul layık buldı. Bigräk tä anıñ AQŞta yäşäwçe tatarlar cırı ozın-ozaq alqışlarğa kümelde. Mäğnäse dä tirän şul: “yörgän cirlär berni tügel, tuğan ilkäyem qayda?..”
Konsert üze dä yuğarı sänğäti däräcädä oyıştırılğan, qatnaşuçıları da bik uñğannar: “Qazan” biyü ansamble solistları Liliä Ğalieva här Sergey Yefremov, cırçı Läysän Xafizullina, alıp baruçı İlşat Xäbibullin, bayançı Aynur Fatıyxov . Soñğısı turında ayırım süz dä artıq bulmas: qurayçı da, waq ğarmunnarda uynaw ostası da, Röstämneñ can dustı da ikän ul. Näq şuşı konsertta qatnaşu öçen 700 çaqrımnı yaqın itep ätise – Başqortstannıñ xalıq artistı Xalit Fatıyxov häm änise Liliä xanım belän Ufadan kilgän. Häm mondıy tuğrılıqlı duslıq Röstämne dä uñğan cırçı sıyfatında ğına tügel – yaxşı keşe itep tä kürsätä aladır.
Ayrat İbrahim, Sember
