Gäzitneñ redaktorı İsxaq Xälimev äytüençä, Ölkä üzägendä genä 100дән artıq danägä kübäygän. Awıl rayonnarında da, az bulsa da, alğarış bar.
Moña qädär Yaña Malıklı rayonında yäşäwçe millättäşlärebez ölkädä iñ küp yazıluçılar bulıp kildelär. Kiläse yılğa ölkä üzäge bu rayonnı uzıp kitkän – kiosklarda satıluçı danälär belän sanasañ, barlığı 1300 artıq ğailä “Ömet”le bulaçaq. İsxaq Xälimev monı Yaña şähärdä tatar etnokomponentlı mäktäp açıluı belän dä bäyli. Yaña Malıklı rayonı 850 danä belän ikençe urında, annan soñ İske Kulatqı häm Nikolaev rayonnarı 700 danä tiräse.
Bu uñışqa ireşüdä İsxaq Xälimev qayber rayonnarnıñ avtonomiäläre citäkçelärenä häm maltabarlarğa räxmät belderä. Mäsälän, Radişçev häm Nikolaev rayonnarında eşläp kilüçe Yunıs Biryukov häm Töxfät Biktimerovnı ayıruça bilgeläp ütte ul. Yunıs äfände üz xisabına rayonda yäşäwçe awıl veterannarın “Ömet” belän tä''min itkän. Maltabar Kamil Xämzin häm “Aq Bars” bankınıñ Ul''yan filialı citäkçese üz millätebezdän bulğan xezmätkärlären yazdırğannar. “Stroyplatmass“ şirkäte häm “Volga” isemle awıl xucalığı kooperativı citäkçeläre dä aldınğı xezmätkärlärenä büläk sıyfatında, yıldağıça, 50şär danä yazdırğannar.
Gäzitneñ tirajı artuğa tağın ber säbäp bar kebek. Härxäldä, İslam kul''turası üzägeneñ Ul''yan filialı citäkçese Ruslan Kamalov şundıy fikerdä.
Elek Qazan radiosı “Azatlıq” tapşıruların ozın dulqınnarda birgändä yaxşı ide, räxätlänep tıñlap bula ide. Ä qısqa dulqınnar aşa tıñlaw qıyın. Berençedän, andıy radioalğıçlar siräk, küplär satıp alırğa da tapmıylar. Bulğanda da tapşıru törle tawışlar belän tutırıla, qomaçawlar küp, bik zur tüzemlelek belän genä tıñlıysıñ. Qayçaqta bötenläy tıñlap bulmıy.
Ruslan Kamalov üze “Azatlıq” xäbärläre belän internet aşa ğına bulsa da, daimi tanışıp bara. Läkin küplärneñ mondıy mömkinlege yuq. Menä şul buşlıqnı berqädär “Ömet” gäzite tutıra. Häm näq şunlıqtan moña qädär “Ömet”kä yazılmağannar da anı aldıra başladılar, dide Ruslan Kamalov.
Sentäber ayınnan birle, “Ömet” gäzitendä “Azatlıq” radiosında yañğırağan yañalıqlarnıñ yazma variantı, siräk bulsa da kürengäli. İsxaq Xälimev möhim dip tapqannarı. Menä soñğı sanında da märxüm İrşat ağa Camaletdinovqa bağışlanğan tapşırunıñ yazma variantı çıqtı. Bälki Ruslan Kamalov süzlärendä dä xaqlıq bardır.
“Ömet”neñ tağın ber uñışın äytep ütü urınlı bulır. “Azatlıq” radiosı aşa bu gäzittä cirle qäläm tibrätüçelärebezneñ äsärlären bastıruğa “tabu” çäpälgän ide. İmeş, şiğri häm proza äsärlärne barı tik aqça tüläp kenä bastırırğa yarıy. Berdän-ber tatar gäzitendä dä üz äsärlären bastıra almağan keşelärne soñğı stimulınnan da märxüm itüne tatar cämäğätçelege bik awır qabul itkän ide. Şöker, redaksiäneñ häm tatar cämäğätçelegeneñ tırışlığı mondıy ğayre tabiği närsäne yırıp çığuğa kiterde. “Ömet” bitlärenä näfis äsärlär dä qaytarıldı. Häm monı uquçılar da bik cılı qabul ittelär.
Ayrat İbrahim, Sember
