Başqortstanda Yaña yıl bäyräme ruxı bu atna başınnan uq sizelä başlağan ide inde. Mäktäplärdä, balalar baqçalarında Çırşı bäyrämnäre oyıştırılsa, küp kenä xezmät kollektivlarında yaña yıl kiçäläre ütkärelä. Restorannarda, kofelarda oçraşıp, räsmi bulmağan şartlarda yal itä, küñel aça yıl buyı eşläp arığan xezmätkärlär. Andıy kiçälärne tağın da küñelleräk itü öçen, xäzer xälle genä oyışmalar häm şirkätlär kiñ bilgele artistlarnı da, yäş sänğät'kärlärne dä çaqıra.
Cırçılar şulay itep bu könnärdä şaqtıy ğına aqça suğıp qala. Tatar häm başqort sänğät yoldızların çaqıruçılar da küp. Xätta qayber cırçılar ber kiçne beryulı ike-öç urında bulıp cır küçtänäçlären öläşergä ölgerä. Tanılğan cırçılar Aydar Galimov, İdris Gaziev, İdris Kälimullin, Fädis Ganiev, Liliä Biktimerova, Azamat Timerov kebek populyar cırçılarğa bu könnärdä ayıruça ixtıäc zur ikän. Cırçı İdris Kälimullin citäklägän “Säyär” tatar estrada teatrı bu könnärdä xätta Çırşı bäyrämnäre ütkärügä belderülär dä birä. İdris Kälimullin üze Qış babay bulıp xalıq küñelen aça.
Yaña yılnı qarşılağanda – 31 dekaber kiçendä Ufanıñ qayber mäydannarında şulay uq tamaşalar bula. İñ mawıqtırğıç tamaşa, här yıldağıça, başqala üzägendäge Lenin mäydanında bulaçaq. Anda başta Qış babaylar bäygese, annan soñ häwäskär artistlar çığışları bula. Ä kiçke unberdän tönge ikegä qädär tanılğan cırçılar häm muzıkantlar bäyräm käyefen arttıra. Bäyrämgä noqtanı ozaqqa suzılğan bäyräm salyutı quyaçaq ikän. Xäyer, bäyrämgä noqtalar un könnän soñ ğına quyılır inde. Añarçı kön dä öterlär genä bulır. Şul öterlärne quya-quya xörmätle radio tıñlawçılarıbız arıp betmäsen, üzläreneñ dä, yaqınnarınıñ da sawlıqların saqlasın ide dip telik. Bäyrämnärebez möbaräk, öställärebez tügäräk bulsın, xörmätle duslar, citep kilüçe yaña yıllar belän sezne. Fänis Fätxi, Ufa
