Ölkäneñ 8 mäktäbennän kilgän 33 uquçı yazma künegülär dä eşlädelär, teldän dä söylädelär, soñınnan ayırım ber kütärenke ruxta bersennän- berse matur şiğerlär dä uqıp kürsättelär. 33 bala- 8-nçe, 9-nçı, 10-nçı, 11-nçe sıynıf uquçıları ide. Tatar tele buyınça olimpiada yıldan- yıl sıyfatlana bara. 33 uquçınıñ tuğızı- yegetlär bulu da quanıçlı küreneş, ciñüçelär arasında da – yegetlär. “Yaqtılıq” mäktäbe uquçısı Azat Nurullin Musa Cälilneñ “İmän” isemle şiğeren söyläde. Ä Nuraniä Kadämova Hadi Taqtaşnıñ poemasın yattan uqıdı. Şunısı iğtibarğa layıq, balalar klassik şağirlär belän berrättän bügenge şağirlärneñ dä äsärlären yatlağannar.
Ä inde üz awıllarında yäşäwçe şağirlärneñ dä icat ürnäklären olimpiadağa alıp kilü ayıruça maturlıq östäde. Ölkäneñ Ğali awılınnan kilgän 9-nçı sıynıf uquçısı Rinat Väliev awıldaşı Saimä Morzaxanova şiğeren uqıdı.
Ölkädän cıyılğan uquçılar arasında ike qız üzläre dä şiğer yazalar ikän. Alar Tatar Äbdekie awılınnan Zöxrä Nuretdinova häm Yaña Usman awılınnan Rufinä Xäyrullina. Rufinä Xäyrullina “Yaña Usman” isemle şiğer icat itkän. Zöxrä Nuretdinova “Ber küreşü- ber ğömer” isemle tirän eçtälekle şiğer yazğan:
Ğälämät zur yoldızlar da
Noqtağa äwerelä.
Üz telen onıtqan xalıq
Yäşi almıy- ul ülä.
Bügen Rusiä türäläre tatarnı telsez qaldıru öçen barçasın da eşlilär. Samar ölkäsendäge tatar awıllarındağı mäktäplärdä tatar tele uqıtılmıy. Rusiä däwläteneñ töp qanunı buyınça, här millät üzeneñ telen öyränergä xoquqlı. Samar ölkäsendä Konstitutsiä 8 yäşkä citkän tatar balasına ğına qağıla, çönki 2-nçe sıynıftan başlap qına tatar älifbası öyränelä. Berençe sıynıf balası moña mäxrum, berençe sıynıfta tatar balasına älifba öyränergä säğät qalmağan Rusiä mäğärif ministrı Fursenqo äfändeneñ ukazı nigezendä.
Şamil Bahautdin, Samar
