Çara “Şüräle” baletınnan muzıkal' özek belän başlandı. Artaban alıp baruçı Alsu Älmäteva uquçılardan Tuqay äkiätlären atawnı soradı. Sorawlar “Su anası”nnan başlap “Şüräle”gä citkänçe bardı. Häm şunnan soñ ğına kompozitor turında süz başlandı. Färit Yarullinnıñ niçek böyek kompozitor bulıp citlegüe - anıñ tormış yulı epizodları nigezendä añlatıldı. Alsu süzläre balalar çığışları belän çiratlaşıp bardılar. Şunısı iğtibarğa layıqtır: Färit Yarullinnıñ balaçağı turında süz barğanda, 1-nçe sıynıf uquçıları berençe bulıp çıqtılar da. Färit üsä tora – balalardan da ölkänräklär çığa säxnägä. Älbättä inde, alar Färit Yarullin äsärlären başqaru däräcäsendä tügel.
“Färit Yarullinnıñ yubileyı da tügel, nigä näq aña bağışlanğan kiçä oyıştırdıñ?” – digän sorawğa Tatar mädäni üzäge citäkçese Rinat Sadıykov menä ni dide:
(Bezgä küpme çara uzdıru turında plan birälär. Yubilee bulmasa da, anı xalıqnıñ isenä töşerergä buldıq. Moña Färit a'bıynıñ 1941-yılda näq Ul'yanda “Qızıl komandirlar kursı”n tämamlap, frontqa monnan uq ozatıluın da iskä töşerergä kiräk dip taptıq.)Äytergä kiräk, kiçä bik canlı uzdı. Häm monı Rinatnıñ çın sänğät'kär yeget buluı belän dä añlatıp buladır. Änä bit uzğan atna yal könendä genä İske Mayna rayonı İske Qızılsu awılında da menä digän “Narduğan“ kiçäse uzdırıp qayttılar. Xalıqqa tanış bulmağan bäyrämneñ asılın añlattılar, balalar belän bu bäyrämneñ qayber uyınnarın oyıştırdılar. Anıñ belän genä çiklänmiçä, bügenge Çırşı bäyrämeneñ qortqıçlığın, borınğı törki babalarıbıznıñ çın tabiğät balaları sıyfatında yäşägännären dä añlattılar. Şulay uq bu bäyrämneñ İslam dinen qabul itkänçe töp yolalarnıñ berse bulğanın da.
Tik şunısı beraz aptırattı ul waqıtta: gubernatornıñ atnalıq eş planına bu çara “Keräşen tatarlarınıñ yola bäyräme “Narduğan” buyınça ölkä seminar-kiñäşmäse” dip atalğan. Awılda isä keräşennärneñ berwaqıtta da ise dä kilmägän bulsa da. Çara öçen cawaplılar Mädäniät idaräse başlığı Tat'yana İvşina häm “Duslıq yortı” dip atalğan bina xucabikäse Sof'ya Orlova kilmägännär dä ide. Dimäk, seminar süze urınsız bulıp çığa, häm aptıraşlı sorawğa cawap birer keşe dä yuq ide. Bäyrämgä qaytsaq, ul yaxşı uzdı, diärgä kiräk. “Keräşen” süze dä iskä alınmadı.
Mondıy çaralar Rinat Sadıykovnı çın mädäniät xezmätkäre dip tä atarğa nigez birä. Çınlap ta, Gölsinä Gerasimova kitkäç, Mädäni üzäk eşçänlege küzgä kürenep yaxşıra bara ide dä bit – Rinatıbız 7-fevral'dä bu eştän kitüe turında ğariza yazğan ikän inde. Säbäben añlatudan baş tarttı ul. Bezgä isä farazlarğa ğına qala.
Ayrat İbrahim, Sember
