Çara, 15 yäşennän ük ayaq-qulları xäräkätsez buluğa qaramastan, qälämen teşlärenä qıstırıp bulsa da, şiğerlär icat itkän, räsemnäre öçen “Filantrop” isemle xalıqara premiägä layıq bulğan häm Ğayaz İxaqi premiäse laureatı Ğaqi Säğirevneñ 6-nçı kitabın xalıqqa täqdim itü häm şuşı uq şähär şağire, suğış veteranı Näbiulla ağa Galiullovnıñ 80 yıllıq yubileyıena bayğışlanğan ide.
Mäläkäs şähäreneñ “Vosxod” isemle iñ zur mädäniät sarayı şığrım tulı ide. Tamaşaçı arasında yäş buınnıñ bik küplege dä iğtibarnı cälep itärlek. Çığışlar, älbättä inde, ike şağirebezgä dä soqlanu, alar belän ğorurlanu mäğnäsendä bardılar. Menä tanılğan şağirebez İdelbikädän ber özek:
Räxmät, Gakıyl', olı şağir,
Jällämiçä aqtıq köçeñ,
Teträndergeç yöräk seren
Bezgä büleşkäneñ öçen.
Yubilyar Näbiulla ağa tamaşaçığa 80 yäşlekkä citkänen sizmi dä qalğanı häm äle dä üzen yäş keşedäy xis itüe turındağı şiğeren citkerde. Gakıyl' Sägıyrev isä, cıyılğannarğa räxmät belderep, elekke oçraşularnı da iskä töşerde, häm bu yulı “Yöräk sere” isemle kitabın çığuın citkerde. Ä annan soñ näq yöräk turındağı şiğeren tamaşaçığa citkerüne Rawil Şäfıyğullinnan soradı, çönki üzem sänğäti uqıy almıym, dide.
Kiçä üze isä, şağirlärebezne olılawdan tış, räsmi xakimiätneñ häm kürşe xalıqlarnıñ Mäläkäs tatarlarına qarata ixtiramın da kürsätte, dide zalda utıruçı kürşe xanım. Anda şähärneñ barlıq diärlek citäkçeläre dä qatnaştılar, şağirlärgä häm cıyılğan xalıqqa cılı süzlär citkerdelär. Läkin süz genä dä tügel.
Ölkä üzägennän ayırmalı bularaq, monda başqa millätlär wäkilläre citäklägän sänğät kollektivları tatar mädäniätenä dä tirän iğtibar häm ixtiram kürsättelär. Svetlana Qoçneva kollektivınıñ iseme dä – “Sanduğaç”. İlham Şakirovnıñ “Sin sazıñnı uynadıñ” digän cırı xätta üzençälekle şärqi bizäleştä äzerlängän.
Annan Telikova citäkçelegendäge - “Antel”, İrina Yakovenkonıñ “Rossiänoçqa” isemle biü kollektivları çın tatar milli ruxlı öçär biü äzerläp alıp kilgännär. Älbättä, härwaqıttağıça, üzebezneñ Fäniä Xäliullova citäkçelegendäge “Qarlığaç”, “Sünmäs yoldızlar” isemle ansambl'läre çığışları da kiçäne bizädelär. 4 säğät barğan tamaşada yalğız cır belän çığuçılar da baytaq buldı. Ämma iñ küñelgä bal da may bulıp yatqanı – barlıq kollektivlarnıñ da güzäl tatar milli kiemnärendä buluı. Ölkä üzäge belän çağıştırsañ, cir belän kük arasıday.
22-mäktäp direktorı Mönirä Djumaeva äytüençä, tatar milli kiemnärenä dä aqça tabıluı – şähärneñ Mädäniät häm sänğät idäräse başlığı Lyudmila Jukova xezmäte. Tamaşadan soñ, Lyudmila xanımnan mondıy uñay qaraşnıñ säbäpläre turında soraw birergä dä forsat tabıldı. “Tatarlar, dide ul, tirän tarixlı, tırış häm uñğan xalıq. Min monı küptän beläm, çönki Qazanda tuğanmın, yartı ğömerem anda uzdı. Qazannıñ könnän-kön çäçäk ata baruına şatlanam, anıñ xalıqara dan qazanuı belän ğorurlanam. Ä Dimitrovgradta barlıq millätlärgä qarata da şundıy mönäsäbät. Bigräk tä ike böyek xalıq – urıs belän tatarğa qarata uñaylıqlar küp, çönki alar üzläre dä bik aktivlar.”
Ä Sember belän Mälәkäs tatarlarınıñ milli tormışındağı upkınday ayırmalar turında isä ayırım söyläşü taläp iteläder.
Ayrat İbrahim, Mäläkäs-Sember
