Uzğan yäkşämbedä Gabdelfät Safin, atna-un kön elek kilgän Salawat ölkäneñ iñ zur – 1500 tamaşaçığa isäplängän Lenin memorial' üzäge zalında tamaşa qıldılar. Gabdelfät konsertında da buş urınnar bik az ide. Ä Salawatnıqına isä işek töbendä artıq bilet telänep torırğa kilgännär dä bixisap ide. Şunısı da iğtibarğa layıqtır: Salawatıbız citdilängän, üz-üzen totışı da, konsertınıñ eçtälege dä tamaşaçıda oluğ qänäğätlek xisläre uyatqan, küräseñ: barı tik maqtaw süzläre genä işetelde. Çınlap ta bu tamaşa çın milli rux belän suğarılğan, şul uq yünäleştä tamaşaçını da tärbiäläw maqsatın da quyğan kebek.
Boları – estrada digäne, “zamançası”. Ä menä Tatarstannıñ danlıqlı Cır häm biü ansamble şul uq memorial' üzäktä Bulırğa tieş ide. Bilet satıp aluçılar bik az bulğanğa, bu güzäl ansambl' kilmäde. Säbäbe nidäder inde: ällä xalıq çınlap ta yuğarı sänğät'kä, çın milli cır-iyüllärgä bitarafmı, ällä oyıştıruçıları buldıqsızmı?
Şul uq zalda Kärim Tinçurin isemendäge teatr kiläçäge turında da iğlan bulğan ide. Ul da bulmadı. Säbäbe şul uq: biletlar az satılğan bulıp çıqtı. Ä menä uzğan ayda üzen tanıtıp kitkän Rail Sadriev citäkçelegendäge Bua satira teatrı tamaşasına xalıq tağın da küpläp kilgän ide.
Nigä soñ Kärim Tinçurin teatrına kilmägän layıq satira teatrına küp cıyılğan? Şuşı sorawğa menä nindiräk cawaplar birde tamaşaçı tänäfes waqıtındağı soraştırularğa:
Kämit qızığraq, awır tormıştan yal itep alırğa kiräk.
Rail Sadriev minem awıldaşım – ğorurlanam häm yärdäm itärgä tırışam. Tanışlarımnı da öndädem.
Tinçurinnıqına da bilet alğan idem – bulmadı şul.
Mişär mişärgä yärdäm itärgä tieş.
Balalarım bilet alğannar ikän – alar alıp kildelär.
Bolay da awırlıqlar turında uylap baş qatqan, şırqıldap kölep utıru – çın yal bit ul.
Bualılar yaqtaşların yaratırğa tieş – şuña kildem.
Bez awıldan kildek, Qolmayırdan. Tinçurin turındağısın işetmädek kenä, kilgän bulır idek.
Bik siräk kilä şul bezgä teatrlar. Xalıq künmägän. Qamal teatrı da kilsen ide, cıyılır idek bergäläp…
Räxätlänep kölep utırabız.
Äye, kölkele tamaşa. İlfaq Şihapovqa ğına xas ostalıq belän tözelgän dialognıñ häm cömläse, diärlek, kölke tudıra. İseme dä şul uq yünäleştä bit: “Bäxeteñne käcä sözsä…”
Tamaşaçı şır kölep utırdı. Amerika kunakxanäseneñ här üzençälegenä çiksez soqlanudan alıp, ike personajnıñ üz xatınnarı turındağı ğäybätlärenä qädär - kölke, kölke.
Ber minutlıq kölke – ber ıstakan qaymaqqa tiñ, digän ğıybarä bar. Şöker, aşaw yağınnan yarlı tügelbez. Ä menä aqça quu arqasında üseş alğan ruxi xäyerçelek – şomlıraq. Tatarstannıñ Cır-biyu ansamble konsertı beraz bayıta alır ide dä – anı qaramadı Sember tamaşaçısı. Häm teläwçelär dä yuğarı sänğäti tamaşadan mäxrüm qaldılar. Az şul andıylar…
Ayrat İbrahim, Sember
