Tatarstanda da sişämbe könne iğtibar üzägendä Rusiäneñ berençe prezidentı Boris Yeltsinnıñ wafat buluı xaqındağı xäbär tordı. Respublika citäkçelege Yeltsin ğailäseneñ, yaqınnarınıñ qayğısın urtaqlaştı. Anda Tatarstan prezidentı Mintimer Şäymiev, bezneñ däwlät tarixında Rusiäneñ berençe prezidentı role bäyäläp betergesez. Xäzerge zamannıñ tanılğan däwlät eşleklese, ilneñ qatlawlı üzgäreşlär çorında ul Rusiä xalqınıñ kiläçäge öçen üz östenä zur yök aldı, Rusiä Federatsiäseneñ säyäsi tormışında radikal' demokratik üzgärtep qorularnıñ ışanıçlı garantı buldı. Tatarstanlılarnıñ xäterendä Boris Yeltsin iseme härwaqıt Tatarstan Respublikasınıñ däwlätçelege torğızıluı häm üsüe, ildä çın federalizm prinsipları formalaşu belän bäyle bäyle däwlät ähele bulıp qalır, dip yazıla Mintimer Şäymievnıñ Boris Yeltsin wafatı uñaennan qayğı urtaqlaşu telegrammasında.
Çınlap ta, Rusiäneñ berençe prezidentı Tatarstannıñ yazmışına turıdan-turı täesir itkän säyäsätçe buldı. Häm şunısın da äytergä kiräk, näq menä Yeltsin Rusiä citäkçese bulğan çorda respublika möstäqillek yawlawda küpkä ireşä aldı.
Ä menä Boris Yel'sinnı qazanlılar niçek islärendä qaldırğa mikän?
Bügenge açıq mikrofon soraştıruında bez şuşı xaqta beleşergä buldıq.
Yel'sin bezneñ küñellärebezdä Rusiäneñ berençe Prezidentı bularaq istä qala inde. Çönki Rusiäneñ yaña etabında anı demokratik yulğa quydı häm Rusiä bu yuldan taypılmas dip uylıybız inde xäzer.
Berençe Prezident bulğanı öçen istä kiläçäk inde. Anın zamanında Putç buldı, kommunistlar bette, xatını bik äybät Nainası.
Ul miña tennis yaratuı belän häm bik yış premyer-ministrlarnı alıştıruı belän istä qaldı.
Dönyanı bolğatuçı, Çeçnyadağı suğışnı tağın da qızdıruçı, SSSR nı tarqatuçı häm keşelek dönyasına bik küp zıyannar kitergän keşe ul.
Yuq äytä almıym, onıttım min anı.
Xalıqnı häm balalarnı bik yarattı ul. Uzğan yıl Sabantuyına kilgän ide ul. Min anı üz küzem belän şunda kürdem. Ul Qazanğa bik yağımlı keşe buldı.
Yelsinnı yaxşılıq belän genä iskä ala almıym. Ul böten ilne tarattı. Xäzer xökümät kütärmäkçe bula, läkin berni dä eşli almıy.
Tatarstanda yäşäwçelär öçen Yel'sin üzeneñ ber süze belän istä qalırğa tieşter. Zamanında ul “Küpme suverenitet kiräk, şul qädär alığız” digän ide Rusiä subyektlarınıñ citäkçelärenä. Häm şunnan faydalanıp subyektlar suverenitet alıp qaldılar.
Gölnaz Şäyxetdin
