“Azatlıq” radiosı aşa Tatarstan häm Sember maltabarlarınıñ üzara xezmättäşlekne nığıtuğa bağışlanğan berdäm cıyını turında xäbär bulğan ide inde. “Ömet” gäzite dä bu turıdağı yazmasına tulı ber säxifäsen birgän.
Professor Mäğzüm Sälaxovnıñ ikençe näwbätkä Qazan Däwlät universitetı rektorı bulıp saylanuı turında da külämle genä yazma iğtibarnı cälep itä. Monısı da Sember belän bäyle: tumışı belän semberneke bit ul. Fängä yulı da biredä başlanğan: Kerenski häm Ul'yanov kebek mäğlüm şäxeslär tämamlağan uqu yortın – Semberneñ 1-gimnaziäsen – Mäğzüm äfände 1968-yılda Altın medal' belän tämamlağan häm şul uq yılda KDUnıñ Fiziqa fakul'tetına uqırğa kergän. Şunnan birle Qazanda yäşäsä dä, tuğan cire belän elemtälären özmi – qaytqalıy tuğannarı yanına.
“Ömet” kürenekle yaqtaşıbıznıñ fänni eşçänlege belän tanıştırsa, anıñ qärdäşlärennän berse cirle şağirebez Rifqat Xismät - keşelek sıyfatları turında törle oçraşularda soqlanıp söylärgä yarata.
Rifqat digännän, anıñ üz şatlığı da zurdan: Tatarstan kitap näşriätında “Küñelem közgese” isemle şiğriät cıyıntığı çıqtı. Eçtälege – bülekläreneñ isemendä ük: “Bez – tatar balaları”, “Tuğan cir – dönya cännäte”, “Tınıç bul sin, Tuğan il”, “Üz suqmağım”.
Şuşı kitapta da, “Ömet”tä dä çıqqan ber şiğeren radiotıñlauçılar iğtibarına da täqdim itäbez:
Min dä boday börtege dä, şıtıp üstem sineñ cirdä.
Şuña kürä, Tatarstan, sin çıqmıysıñ istän ber dä.
Kiräk qädär buldı miña yaqtıñ, cılıñ, dımıñ, hawañ.
Şuñar sine, i Tuğan cir, härçaq maqtap telgä alamä
Sin bulğanğa min bäxetle – tügel yätim, tügel üksez.
Änkämä tiñ sanıym sine, mäxäbbätem siña çiksez.
Bulır minem yörägemdä mäñge siña irken urın.
Yäşäsäm dä sinnän çittä, min, barıber, - sineñ ulıñ!
“Ömet”neñ şuşı kitapqa bağışlanğan yazmasında, cıyentıknı dönyağa çığaruda yärdämnäre öçen, Damir Şakirovqa, Xarras Äyupkä, Rafis Qorbanğa häm Şahinur Mostafinğa Rifqat'neñ oluğ räxmät süzläre birelä.
Cirle qäläm tibrätüçelärebez oyışması citäkçese İdelbikäneñ tulı ber säxifäne bilägän yazması - “Yazuçı menbäre” digän rubrika astında basılğan. “Yıl yomğaqları awazları” dip atalğan yazmada Lena xanım “Ömet” uquçıların Tatarstan Yazuçıları berlegeneñ soñğı qorıltayı eçtälege belän qısqaça tanıştıra. Härxäldä, İlfaq İbrahimovnıñ - yıllıq programma ütäleşe, Äxmät Räşitneñ – şiğriät, Läbib Leronnıñ – çäçmä ädäbiät, Ğazinur Moratnıñ – publitsistika, Rawil Raxmaninıñ – balalar ädäbiäte, Azat Äxmädullinnıñ – ädäbi tänqitkä bağışlanğan çığışları belän, qısqaça ğına bulsa da, tanışırğa mömkin bu yazma yärdämendä. Süze soñında İdelbikä barça cirle qäläm tibrätüçelärneñ dä äsärlärenä berençe bulıp yul açuçı “Ömet” gäzitenä dä räxmät belderä.
“Ömet”neñ tağın ber faydasın äytep ütü kiräkter. “Çişmä” televizion tapşıruı yabılğaç, bu gäzit tatar öçen berdän-ber reklama çarası da bulıp qaldı. Soñğı ike sanında ul Semberdä häm Mäläkästä bulaçaq Gölnara Timercanova konsertı häm Yumor kiçäse turında iğlannar birgän.
Ayrat İbrahim, Sember
