6 yıl elek Semberdä berençe märtäbä Tatarstan flagı cilferdi başlağan ide. Älbättä, räsmi oyışmanıqı tügel – “Tatneft'”neñ berençe benzin salu stansasında. Anıñ bizäleşe dä Tatarstan ornamentları nigezendä bulğanğa, baytaq tatar balaları anda benzin salunı qulayraq kürä başladılar. Başta filialnıñ ofisı “Venes” digän qunaqxanädä urnaşqan ide – xäzer ayırım üz binası bar. Monısı alğa kiteş bulsa, ikençe yaqtan küñelsezräk küreneş tä päyda buldı: cirle xakimiätkä “Tatneft'” filialınıñ başlığı urınında semberle urıs keşese qulayraq kürengän, dilär. Xäzer şulay.
Şunlıqtan äñgämä qorırğa, wazifası tübänräk bulsa da, tatarça belüçe xezmätkärne saylarğa turı kilde. Qotdus Ğafurov – “Tatneft'-servis” bülege başlığı. Benzinnan başqa barlıq tawarlarnı satuçı kibetlär anıñ qaramağında. Häm ul da “Tatneft'neñ” xällären yaxşı belä.
Äñgämä “Tatneft'” eşçänlegeneñ çit töbäklärgä cäyelüe Tatarstannıñ üzenä faydasın kimetmime? – digän sorawdan başlandı.
- Äye, keremneñ ber öleşe Ul'yan ölkäsenä salım tülärgä kitä, läkin Tatarstanğa da citärlek qala. Niçek tä bulsa satarğa kiräk bit – anı Tatarstanda ğına satıp beterep bulmıy. Faydası ike yaqqa da bar.
- Berençe benzin salu stansasın bik şatlanıp qabul itkän ide cirle tatarlar. Xäzer işäya baralar. Barlığı niçäw soñ?
- 18 “zapravka” häm zur neftebazabız bar. Bıyıl tağın 3 stansa töziäçäkbez. Ölkädä barlığı 27гә citkerergä isäp. Moña cirle xaqimiät tä qarşı kilmi, çönki yaña eş urınnarı anıñ öçen dä faydalı bit.
- Küplär fikerençä, bezneñ ölkädä yağulıq bäyäse YUKOS qaramağında. Xätta ber ük tön eçendä barlıq benzin stansalarında da bäyälärneñ beryulı kütärelüen YUKOS kürsätmäse dip añlatuçılarnı da oçrağan bar. Mondıy fiker nigezleme?
- Yuq, döres tügel. Çönki benzin bäyäsen bazar mönäsäbätläre köyli. “Tatneft'”neke 20 tiengä genä bulsa da tübänräk. Annan soñ bezneñ benzinnıñ sıyfatı da yuğarıraq. Şunlıqtan bezneñ daimi klientlarıbız bar. Ä YUKOS bit ul üze satıp alğan benzinnı ğına sata. Äye, ul da üzençä caylaşırğa tırışa, törle taşlamalar belän, mäsälän.
- Ä küläm buyınça “Tatneft'”ne YUKOS belän çağıştırsañ?
- Alar – kiñräk. Alar berençe bit, ä bezgä äle 6 ğına yäş monda. Şulay da cäyelä barabız. Bügen 18 stansabız bar. 27гә citkerergä uylıybız. Qayber keçeräk firmalarnıñ stansaların satıp alu oçraqları da bar. Ni äytsäñ dä, konkurensiä bara bit. Alğa barırbız kiläçäktä dä…
- Ä YUKOS belän qapma-qarşılıq çatqıları kürenmime?
- Yuq, bazar wäzğıäte xäl itä bit eşlärne. Xalıq üze saylıy. İñ möhime – yağulıqnıñ sıyfatı. Häm qullanuçı bezne näq şul yaqtan tanıy da inde.
- Ä Rusiäneñ başqa töbäklärendä “Tatneft'” niçek xis itä üzen?
- Yaxşı, diärgä bula. Çuaşstanda 200 çaması stansabız bar. Vladimir ölkäsendä uñışlı eşlibez. Xäyer, Mäskäw yulında da yış oçrıy bezneñ stansalar. Leningrad ölkäsendä, Ukrainada baytaq. Samar ölkäsendä tamır cäya barabız.
- Yarıy, şöker, diärgä dä bula kebek. Tik menä neft' digäne dä çiksez tügel bit. Annan soñ Tatarstannıñ cirmayı kükertle buluı belän dä bik ük qulay tügel.“Drujba” torbası iñ yaxşısın suırıp alıp betkän, dip tä işetkän bar. Tatarstan yatmaları niçä yılğa citär, dip farazlarğa bula?
- Alla ğına beläder. Anıñ kükerten tazartıp ta bula inde. Anısı betsä, başqaları tabılır. Bezneñ ğömergä citär, ä kiläçäk buın başqa närsä uylap tabar. Äle änä ğaz yarıysı ğına rol' uynıy başladı. Mazut zapasları da üz çiratın kötäder. Ä anı yağulıq qına tügel, çimal sıyfatında da qullanu küp tarmaqlı industriäneñ nigeze dä bulıp tora ala. Qısqası, Allahı Täğälä baylıqnı birgän, anı döres qullanu häm şunıñ belän qanäğät bulıp yäşi belü genä kiräk.
“Tatneft'”neñ Semberdäge bülekçäse xezmätkäre Qotdus Ğafurov shulay dide.
Ayrat İbrahim, Sember
