Düşämbe könne ministrlar kabinetında mädäni miras häm mäğlümat çaraları eşçänlegendä qanun ütäleşen tikşerüçe Rossoxarnkul'tura xezmäteneñ citäkçese Mixail Boyarskov qatnaşında kiñäşmä uzdı. Anda süz Qazanda uzaçaq mädäni miras häm häykällärne saqlawğa bağışlanğan 6 nçı Bötenrusiä qorıltayın äzerläw turında bardı.
Tatarstan gumanitar mäs’älälären iğtibarın bermä – ber arttıra. Monı sizep alğan jurnalistlar härwaqıt mäğärif, mädäniät turındağı räsmi oçraşularğa kümäkläşep kilälär. Düşämbe könne ministrlar kabinetındağı tikşerelgän mäs'älär bik küp bulsa da, näq menä mädäni häm tarixi häykällärne saqlaw turındağı cıyılışqa kilgän telekamera häm radio mikrofonnar kütärgän jurnalistlar xättin aşqan ide. Monitor aşa kiñäşmäne mäğlümat üzägennän qarap torğanda şul añlaşıldı. 18 yünnän 23 iyüngä qädär Qazanğa Rusiäneñ 84 töbägennän häykällärne saqlawçı belgeçlär cıyılaçaq. 6 Bötenrusiä qorıltayında xäzerge çorda tarixi häm mädäni häykällärne saqlaw häm dönyağa kürsätüneñ iñ aktual' yaqları tikşerelergä tieş. Qorıltaynıñ oyıştıru komitetı räise xökümät başlığı Röstäm Miñnexanov bulğaç, bu çaranıñ oyıştıru matdi yaqlarına iğtibar häm citdi köçlär yünältü küzgä taşlandı.
Xäzer inde nindi seksiälär, çığışlarnıñ yünäleşe, kemnär çığış yasawı açıqlanıp kilä. Bu utırışta qorıltaynı äzerläw komitetınıñ räistäşe Mäskäwdän kilgän zur türä Boris Boyarskov ta qatnaştı. Rossoxrankul'tura dip atalağan agentlıqnıñ citäkçese yäkşämbe könne Qazanğa kilep Şähri Bolğarğa häm başqa tarixi urınnarğa boralaqta oçıp barıp qaytqan. Oyıştıru komitetında qorıltayğa äzerlekneñ yaxşı buluı äytelde. Ul 18 iyündä Qazan milli mädäni üzägendä açılır dip kötelä. İkençe könne delegatlar 4 palubalı köymägä utırıp, 1000 yıllıq bäyrämen ütkärüçe Alabuğa şähärenä häm başqa töbäklärgä baraçaq. Su östendä xäräkättä çaqta bik küp utırışlar ütäçäk. 22 iyündä Bolğar tarixi tıyulığında Bötenrusiä qorıltayınıñ yabılu cıyılışı ütärgä tieş. Telgän delegatlar 23 iyündä Qazannıñ Kirov rayonı Sabantuyında qatnaşa ala.
Utırıştan soñ jurnalistlar belän oçraşqanda Boris Boyarskovqa şaqtıy kisken sorawlarğa cawap birergä turı kilde. Qazan jurnalistları häykällärne saqlaw qorıltayların ütkärü urınına häykällärne tözekländerergä kübräk aqça totu döres bulmasmı dip üzläreneñ ütken tellegen kürsätte. Boyarskov isä ikese dä kiräk dip sanıy.
“Sez sanağan häykällär belän berrättän tağın 25 meñ federal' häm töbäklärdäge 30 meñ häykälne saqlaw häm tergezü kiräk. Bez bu häykällärgä aqça bülü belän genä çiklänmi alarğa ışanıçlı xuca da tabırğa tieş.” Premyer-ministr urınbasarı, mädäniät ministrı Zilä Välieva häykällär saqlaw buyınça qorıltay ütkärüneñ maqsatların bolay dip añlattı.
“Qazannıñ 1000 yıllığına eşlängän eşlärneñ täcribäsen tuplap kürsätergä. Şuşı eşne alıp baruda nindi qazanışlarğa Qazan ireşkän häm bezgä iñ möhime bügenge köndä Rusiä külämendä bu mäs'älä buyınça wäqälätlärne kübräk subyektlarğa birälär, şul uq waqıtta töbäklärgä finanslaştıru mäs’äläse niçek qaralır mikän. Çönki bügenge köndä federatsiä häykälläre dä bar bezneñ cirlektä. İñ möhime menä şuşı wäqälätne subyektqa xäzer birgäç, aña mömkinçeleklär dä birergä kiräk. Däwlät tarafınnan qarawmı ul, qanun buyınça şundıy mömkinçeleklär dä tudırırğa kiräk. Şunıñ öçen bu cıyılışta yaña qanun üzgäreşläre dä tikşerelergä tieş. İkençedän inde, bez şatbız küpmeder däräcädä bu mäs'älärdä Rusiä külämendäge täcribä kübräk Qazanda tuplanğan. Şuña kürä respublikanı qararğa kilälär. ” Rossoxrankul'tura çinovnikları Qazan jurnalistlarnıñ ütken telle, ziräk häm taläpçän buluın bilgelädelär. Alar fikerençä, Häykällärne saqlaw eşendä bu bik kiräk sıyfat.
Gölnaz Şäyxetdin
