Soñğı waqıtta küp kenä tele jurnalistlar Tatarstan televiden'yesında çınığu alğannan soñ, üzäk televiden'ye kanallarına eşkä alına başladı. Bu xätta ğädätkä kerä başladı. Äytik, Yaña ğasırda eşläwçe Dmitriy Nesterov “Sport” kanalına alındı, şulay uq “Yaña ğasır” kanalınıñ xäbärlären alıp barğan Liliä Gil'deeva menä inde berniçä ay däwamında NTV da “Segodnya” tapşıruında efirğa çığa. Ä menä “Efir” kanalındağı Maksim Şäräfetdinov isä 1 nçe kanalğa eşkä küçkäç üz imidjın da üzgärtte. İrtänge xäbärlärne alıp baruçı Maksim elekkege kebek küzlek häm tuzğan çäçtän tügel, ä cıynaq häm tıynaq bulıp qalğan. Alar rätenä yaña ğına “Tatarstan” däwlät tele-radiokompaniäsendä eşläwçe Färidä Qorbanğaleeva da quşıldı. Färidäneñ kitüe bötenläy kötelmägän buldı. Çönki ul küptän tügel genä “Vesti” nıñ Tatarstandağı üz xäbärçese itep bilgelängän ide. Ul Mäskäwgä eş käğäzlären räsmiläşterergä barğan cirennän, bu tapşırunı alıp barırğa qalğan. Çönki moña qädär eşlägän alıp baruçı eştän kitärgä bulğan. Üze äytmeşli, aña oçraqlı räweştä genä tieşle waqıtta, tieşle urında bulırğa turı kilgän: “Tapşırularnı alıp baruda minem bernindi dä täcribäm yuq ide. Häm alar mine hönäri sıyfatlarıma qarap almadılar, çönki minem berqayçan da alıp baruçı bulıp eşlägänem bulmadı. Menä soñğı waqıtta üzäk kanallarda tatar alıp baruçıları da yışaya başladı. Bälki bezgä qarata nindider qızıqsınu bardır. Çönki ber qarağanda, bu qızıq häm yat. İkençe yaqtan qarağanda, Rusiädä küp kenä millät wäkilläre yäşi. Häm niöçen ruslar ğına üzäk kanallarda eşlärgä tieş. Nigä äle tatarlar bulmasqa tieş. Läkin minemçä, milli yaq zur ähämiätkä iä tügel. Bu barı tik oçraqlı räweştä genä bulğan xäl. ” Älegä Färidä Qazannı bötenläygä taşlap kitärgä uylamıy. Ber atna Mäskäwdä eşlägännän soñ, atna däwamında Qazanda yal itärgä cıyına. Üzäk kanalda berençe tapşırunı alıp barğanda Färidä bik borçıldım di. “Min älege tapşırunı böten Rusiä qarağanlıqtan borçılmadım. Ä näq menä Tatarstan xalqı küzätep torğanlıqtan qatıraq borçıldım. Tekstnı uqığanda borçılmas öçen yaqın keşeñne küz aldıña kiterergä quşalar. Häm şul waqıtta min küz aldıma elek eşlägän kollektivımnı kiteräm.” Ä menä tanılğan telejurnalist, küp kenä alıp baruçılarnıñ ostazı bulğan Liä Zahidullinanıñ Tatarstan jurnalistlarınıñ Mäskäwgä kitep eşläwlärenä mönäsäbäte nindi ikän? Şul soraw belän bez anıñ üzenä möräcäğät ittek. “Bezneñ jurnalistlarnıñ üzäk televiden'yesına kitüenä min ber dä ğäcäplänmim. Çönki elek-elektän üzäk televiden'ye regionnardağı talantlı jurnalistlarnı häm alıp baruçılarnı üzenä eşkä çaqıra torğan buldı. Häm ul ğadäti äbyr. Ä bezneñ talantlar bik. Ber yıl eçendä genä berniçä jurnalist üzäk kanallarğa eşkä urnaştı. Bezgä alar belän ğorurlanırğa ğına qala. Alar bit üzläre kitmäde, ä alarnı çaqırıp aldılar. Çönki bezneñ Qazanda bik yaxşı televiden'ye mäktäbe. Bik aqıllı, talantlı, ürnäk kürsätä torğan jurnalistlar bezdä çınığu ala häm äle alar bezdä bik küp. ” Liä Zahidullina süzlärenä qarağanda, Tatarstan üzäk televiden'ye öçen äzerlekle belgeçlär çığaru urını da. Üzäk kanallardağı eşkä taläpçänlek, cirle telekanallarğa qarağanda qatıraq älbättä, läkin Qazan qızları häm yegetläre ul eşne cirenä citkerep başqaralar, di Liä Zahidullina. Gölnaz Şäyxetdin
