Däwlät Duması deputatı, Tatarstannıñ Yäşlär oyışmaları şurası räise İldar äfände Sembergä “Milli mädäniätlärneñ Xalıqara yäşlär assambleyası” dip atalğan çarağa çaqırılğan ikän. Forsattan faydalanıp, Mäskäw qunağı tatar cämäğätçelege belän dä ayırım oçraşu oyıştırdı. Anda räsmi dairälärdän Däwlät Duması deputatı Valentin Denisov, cirle parlament deputatları, Ölkä Xökümäteneñ Eşmäkärlekne üsterü ministrı Wildan Zinnurov ta qatnaştılar.
Cirle avtonomiä räise Ramis Safin üz çığışın alda torğan oluğ burıçlarğa bağışladı. İñ awırtqanı – “Çişmä” televizion tapşıruınıñ yabıluı. 6000нән artıq millättäşebez imzalağan xatnı, Prezident apparatına citkerü öçen, İldar Ğıyl'metdinovqa tapşırdı. Ramis Safin şulay uq Tatar Mädäni üzäge qaramağına 20 yılğa arendağa birelgän binanı torğızu häm 91-nçe mäktäpne tieşençä cihazlaw öçen dä Federal' avtonomiä citäkçelegennän yärdäm soradı.
“Çişmä” tapşıruın qaytaru kiräklege başqa çığışlarda da yañğıradı. Ölkäneñ İctimaği Pulatı äğzası Damir Şäripov bay tarixlı tatar awılların ayanıçlı xälgä töşergän säbäplärgä dä tuqtaldı häm bu batqaqlıqtan çığu yulları ezläw buyınça anıq täqdimnär dä kertte.
Däwlät Duması deputatı Valentin Denisov İlbaşı Putinnıñ yıllıq yullamasında milli mädäniätlärne üsterügä bağışlanğan süzlärennän faydalanırğa kiräk, dide. Anıñ äytüençä, ölkä xakimiäte dä bu mäs’älägä iğtibarın köçäytüne küzdä tota. Deputat şulay uq cirle radio häm televizion tapşırularnı qaytaru mömkin dip sanıy häm monıñ öçen tırışlıqlar taläp itelä, dide. Tik üze nindi tırışlıq kürsätäçägen genä äytmäde. Şulay uq tatarnıñ 6000 imzalı möräcäğätennän dä artıq tırışlıqların niçek küzallawına da tuqtalmadı.
“Bolğar yañarışı” oyışması citäkçese Şäwkät Bogdanov isä Qol Ğäli häykälen buldıru tırışlıqları belän tanıştırdı. Ölkä häm şähär xakimiäte bu ğämälgä uñay qaraş belderde, ämma üz arabızda berdämlek yuq, avtonomiä citäkçelege dä bitaraflıq kürsätä, dide Şäwkät äfände. İldar Usmanov Tatar yäşläre üzägeneñ eşçänlege belän tanıştırdı. Ğinwarda ğına eşli başlasaq ta, ike zur çara uzdırdıq: “Tatar yegetläre konkursı” häm “Min tatarça söyläşäm” çarası. Xäzer isä Tatar yäşläre Sabantuyına äzerlek bara, dide İldar Usmanov.
Federal' avtonomiä räise İldar Ğıyl'metdinov alda torğan töp burıçlarğa tuqtaldı. İñ möhime – cirle avtonomiälärne borçığan problemalarnı xäl itügä bulışlıq. Bu barı tik Mäskäw türäläre aşa ğına xäl itelä ala. Mintimer Şäymiev aldıbızğa töbäklärdäge milli oyışmalarğa yärdäm itü burıçın quydı. Bu cähättän BTK belän qulğa-qul totınıp eşläw mäslixät, dide İldar Ğıyl'metdinov.
Berniçä qısqa xäbär.
Novospasski rayonı üzägendä Tatar mädäniäte könnäre uzdı. Bu rayonda tatar awılları yuq, şulay da xalqınıñ 12 protsentın kürşe İske Qulatqı rayonınnan küçenep kilgän millättäşlärebez täşkil itä. Säbäbe – şul uq: İske Qulatqınıñ töşenä dä kerä almağan sänäğät şirkät'läreneñ biredä tözelüe häm alarnıñ eşsezlektän intekkän Qulatqı xalqın suırıp aluı. Qulatqılılar şulay da Novospasski şartlarında da üz yözlären saqlap qalırğa tırışqanday. Äytik, rayon üzägendäge 2-nçe sanlı mäktäptä “Çişmä” häm “Läysän” isemle tatar cırı studiäläre eşläp kilä. Krasnosel'skiy awılında mäçet tözemäkçelär. “Ä rayon başlığı Aleksandr Vrajnov bu izge eşkä häryaqlap yärdäm itäçäk”, - dide anıñ urınbasarı Lyudmila Maksimova
İske Qulatqı qasabasında da yaña mäçetkä nigez taşı salındı. Anıñ töp iğanäçese – Sarıtıula yäşäwçe kürenekle maltabar Eduard Ganiev.
Semberdä Tatarstannıñ Tübän Qama qalasındağı Üzäk mäçet imamı Yosıf xäzrät Däwlätşin bulıp kitte. Ul ölkä üzägeneñ 4 mäçetendä wäğäzlär tottı. Alarnıñ eçtälege – mäçettän tış yäşlär arasında eşne cäyelderü çaraları turında buldı. Mäsälän, alar Quqmara rayonı buyınça dini-mädäni säfärgä cıyınalar ikän. Anıñ qısalarında din ähelläre wäğäzlär totaçaq, yäşlär arasında Qor'än häm bäyet-mönäcätlär bäygese oyıştırılaçaq. Oçraşular, nigezdä, awıl mädäniät yortlarında uzaçaq. Bu mäs'älä buyınça cirle xakimiätlär belän kileşelgän dä inde.
Ayrat İbrahim, Sember
