Çärşämbe könne Qazanıñ “Korston” üzägendä “İslam Konferensiäse Oyışması belän Rusiä arasında yäşlär dialogı” digän Xalıqara konferensiä açıldı. 12нче iyüngä qädär däwam itäçäk älege çara qısalarında, İslam oyışması konferensiäsenä kergän yäşlär berlekläre öçen 8 könlek cäyge lager' da eşläyäçäk. Bu barlıq çaralarda Qazannıñ 15 ilennän wäkillär qatnaşa.
“İslam Konferensiäse Oyışması belän Rusiä arasında yäşlär dialogı” digän Xalıqara konferensiä Tatarstan Prezidentı Mintimer Şäymiev häm İslam Oyışması konferensiäse citäkçese Äkmäletdin İxsanuğlınıñ urtaq kileşüe näticäsendä oyıştırıla. Älege çaranı Tatarstan yäşlär eşläre, sport häm turistlıq ministrlığına uzdırırğa yözlänelgän. Ni ğäcäp Tatarstandağı dini oyışmalar da, möselman yäşläre dä soñğı köngä qädär älege çara turında mäğlümatlı tügel ide. Şuñadır, çärşämbe könne konferensiäneñ açılu tantanasında älläni keşe küp bulmadı. Ayırım alğanda, anda İslam oyışması konferensiäseneñ yäşlär bülege citäkçese Aliä Sarıqaya, Strasburgtan Yevropa Şurasınıñ yäşlär häm sport idäräse citäkçese Ğaya Mişel Brander, Tatarstan Prezidentınıñ tışqı bağlanışlar departamentı citäkçese Timur Akulov häm başqalar qatnaştı. Yäşlärneñ isä kübese Törkiädän ide.
Bu çara qısalarında Tatarstandağı berär yäşlär cämgyäten İslam Oyışması konferensiäseneñ yäşlär bülegenä alu qarala. Bu xaqta
Tatarstan yäşlär eşläre, sport häm turistlıq ministrı Marat Barıyev:
İslam Oyışması konferensiäseneñ yäşlär forumı wäkilläre Mintimer Şäymievtan möselman yäşläre belän tanıştıru öçen şundıy çara uzdırunı sorağannar. Şuña Qazan saylandı. Monda tanışu, fiker alışular qarala. Marat Barıyev farazlawınça, Xalıqara - İslam konferensiäse Oyışmasınıñ yäşlär bülegenä möğean “Sälät” fondı kerer. Ämma bu äle konferensiä tämamlanğan könnärdä genä bilgele bulaçaq.
Törkiädän kilgän Sevinç belderüençä, şuşındıy uq çara mart ayında Törkiäneñ İstanbul şähärendä ütkärelgän bulğan. Anda isä İslam, yäşlär häm bügenge cämğiät mäs’äläse tikşerelgän. Bügenge köndä İslamğa, möselmannarğa qarata törle qaraşlar xökem sörä. Bu xaqta Tatarstan Prezidentınıñ tışqı bağlanışlar departamentı citäkçese Timur Akulov:
İslam dine turında törle qaraşlar yöri. Şular xaqında söyläşülär bulaçaq.Timur Akulov fikerläre şundıy bulsa, Tatarstan diniä Näzäräte räise urınbasarı Wäliulla xäzrät Yağqub:
Möselman tatar yäşläre dä global'läşü çorında dönyadan artta qalmasqa tieş, monıñ öçen aralaşu kiräk.Möselman yäşläre Tatarstan cirlegendä 13 iyüngä qädär bulaçaq.
Qazannıñ Morkvaşi cirlegendä alar öçen lager' eşläyäçäk. Yäşlär isä
pänceşämbe könne Tatarstan prezidentı belän oçraşır dip kötelä. Şulay uq alar Tatarstan Diniä Näzarätendä bulaçaqlar, Qol-Şärf mäçeten qarayaçaqlar, Baltaç Sabantuyda bäyräm itäçäklär. “Azatlıq” radiosı älege cıyın turında kiläçäktä dä tanıştırıp barır.
Landış Xarrasova
