17-18 iyün könne Qazanda “Azatlıq” radiosı tatar-başqort redaksiäse xäbärçeläreneñ yıllıq seminarı uzdı. Bu çarada Başqortstan, Ukraina, Mordoviä, Udmurtiä, Çuaşstan, Sverdlovski, Orenbur, Mäskäw, Çiläbe, Sankt-Peterburg, Omski, Amurdağı Komsomol'ski, Çallıdan 20дән artıq tatar-başqort xäbärçe qatnaştı. Berençe çiratta seminarda xäbärlärne tabu, alarnı birü yunäleşläre, xalıqnı borçıy torğan mäs’älälärgä kübräk iğtibar itü, tatar-başqort temasın yaqtırtu turında süz bardı. “Azatlıq” radiosınıñ tatar-başqort redaksiäse eşli başlawına 54 yıl bula. Yıl sayın diärlek törle töbäklärdäge xäbärçelär cıyılıp eşneñ sıyfatın tağın da yaxşırtu turında fiker alışalar. Soñğı waqıtta “Azatlıq” radiosınıñ tatar-başqort redaksiäse zur üzgäreşlär kiçerde. Şaqtıy ozaq yıllar eşlägän emigrant jurnalistlar Färit İdelle häm Färidä Xämit layıqlı yalğa kitte häm alar urınına yaña xäbärçelär kilde – Bikä Timerova häm Mätin Qarışmas. Alar bügenge köndä Pragada xezmät itälär. Şulay uq “Azatlıq”nıñ FM dulqınındağı tapşıruları beterelep, 20 minut dayjest räweşendä genä qaluı da küp tıñlawçılar öçen kötelmägän xäl buldı. Xäzer dä küplär Qazan byurosına şaltıratıp borçılu belderälär, qısqa dulqınnarda 1 säğätlek tapşırunı tıñlaw mömkinlekläre belän qızıqsınalar. Monnan tış, soñğı waqıtta zamança texnologiälär - internet üseşe nıq sizelä. Bu bilgele, radioda da çağılmıy qalmıy. “Azatlıq”nıñ säxifäsendä barlıq diärlek xäbärçelärneñ dä tapşıruları urın ala. 1 iyüldän isä Qazan häm töbäklärdäge xäbärlärne kiril älifbasında da uqırğa mömkin bulaçaq “Azatlıq” säxifäsennän. Moñarçı ul latinda ğına birelä ide. Seminarnıñ berençe öleşendä näq şuşılar xaqında süz bardı. “Azatlıq” radiosı tatar-başqort redaksiäse citäkçese Rim Ğıyl'fanov bolar xaqında söyläp tapşırularnı tağın da qızıqlıraq itügä yunäleşlärenä basım yasadı. Rim Ğıyl'fanov:
“Azatlıq”ta härwaqıttağıça temalarnı qısqa häm qızıqlı itep eşläw prinsibı aktual' bulıp qala
Rim Ğıyl'fanov tapşırularnı FM formatqa turı kilä torğan itep yasaw, yäğni muzıka bizäleşläre kertü, berençe çiratta xalıqnı borçığan mäsälälärgä iğtibar itü kiräklege turında söyläde.
“Azatlıq”nıñ 20дән artıq xäbärçese isä tapşıru äzerlägändä tua torğan problemalar, awırlıqlarğa tuqtaldılar. Federatsiä Şurasında Rusiä belän Tatarstan Şartnamäse yazmışı qaralğanda, Mäskäwdäge xäbärçebez Näzifä Kärimova:
Köne buyı Däwlät Dumasında yördem. Läkin Tatarstan Parlamentı citäkçese Färit Möxämmätşinnan kommentariy ala almadım.
Näzifä Kärimova Mäskäwdä tormış qaynap toruın häm şähärneñ ber başınnan ikençesenä qadär xäbär cıyu öçen şaqtıy waqıt uzuın belderde. Başqortstannan Rämzit Äbüläev isä yaqtırtırğa kiräkle temalarğa tuqtaldı. Rämzit Äbüläev:
Qayber awıllarda xätta ut ta kermägän, şundağı xalıqnı birergä kiräk.
Başqortstandağı xäbärçebez Rämzit Äbüläevkä quşılıp, Qırımdağı xäbärçebez Diläwär Osman qırım tatarları turında niçek mäğlümat cıyuı turında söyläde.
Seminar barışında “Azatlıq” radiosı eşçänlegeneñ yaña yunäleşläre turında da süz bardı. Rim Ğıyl'fanov:
1990нчы yıllar başında “Azatlıq” kübräk tatar häm başqortlar belän bäyle yazmalarnı ğına birä häm anıñ waqıtın çikläw qaralmağan ide. Xäzer isä atna buyı äzerläw kiräkmi, möhim waqiğa bulsa anı kön däwamında cibärergä kiräk.
Rim Ğıyl'fanov yıl sayın “Azatlıq” tapşırularına sotsiologik xezmätlär tarafınnan tikşerülär uzdırılıp kilüen äytte. Anda isä maxsus bilgelängän bäysez keşelär tıñlap bäya birälär. Bıyıl isä şundıy tikşerülärdä “Azatlıq”nıñ tatar-başqort redaksiäse yaxşı eşli digän näticä çığarılğan.
Landış Xarrasova
