17nçe aprel Qazanda ütkän Bötendönya tatarları milli-mäcleseneñ 4nçe qorıltayında Başqortstannıñ Ufa, Neftekama häm Tuymazı şähärlärennän dä wäkillär qatnaştı. Qorıltayda çığış yasawçılar arasında ike keşe Başqortstannan: respublika tatarları milli-mäclese räise M.Ramazanov häm TİÜ başı A.Ğiniätullin. Ramazanov çığışında Rusiädä tatarlarğa tel statusı birü kiräklegen kütärgän. Ul şulay uq idarägä dä saylanğan. Başqortstan tatarları morzaları cıyını bulıp ütte. Xisap-saylaw cıyılışında oyışmağa yaña baş itep Maqsat Mämliev saylandı. Elekke räis Rif Aqçurin oyışmanıñ eşçänlegendä tormoz buluda, milli problemalarnı belmäwdä ğäiplände. Çınnan da, bu oyışma tel häm başqa mäsälälär öçen köräştä idän astında yattı. Barı tik bäyräm häm tabınnarda ğına morzalar cıyını räise tost kütärep, üzeneñ barlığın belderä ide. Räis urınbasarları itep Kärim Yauşev häm Änwär Tereğulovlar saylandı.
