İran prezidentı Mohammäd Khattami, İrannıñ atom programması mäs'äläsen Berläşkän Millätlär Oyışmasınıñ İminlek Şurası köntärtibenä quyu da – ildä tınıç maqsatlar belän atom texnologiälären citeşterüne tuqtatmayaçaq, dip belderde: "Säyäsi säbäplärdän başqa – İranğa basım yasarğa kiräkmi. Qızğanıç, ämma Amerika Quşma Ştatları üz üzen naçar totışı belän bu mäs'älädä başqalarğa da yoğıntı yasarğa tırışa", dide İran prezidentı. Soñğı könnärdä Quşma Ştatlar xalıqara cämäğätçelekneñ İran atom programması tiräsendäge wazğiätne çişü mäs'äläsendä sülpän buluına borçılu beldergän ide. Waşington, Tähran bomba citeştererlek däräcädä bayıtılğan uran yasıy dip beldersä – Tähran üz çiratında, üzendä citeşterelgän bayıtılğan urannıñ barı tik atom reaktorları öçen qullanılğanın täqrarlıy. İrannıñ däwlät televideniäse, saqlanu ministrlığı urta yıraqlıqqa oça torğan Şahab -3 ballistik raketa sınawları uzdırdı, dip xäbär itte. Elegräk saqlanu ministrı Ali Şamxani, İran Şahab-3 raketaların kamilläşterü mäs'äläsendä eş alıp bara, dip beldergän ide. Saqlanu belgeçläre süzlärenä qarağanda bu tör raketa İrannıñ iñ zur doşmanı İzrael yä Quşma Ştatlarnıñ Farsı qultığındağı xärbi bazalarına citä ala. Tähran şähär şurası äğzase Mahnoush Motamedi başqalada xatın-qızlar öçen ayırım ber park, yäşel zona buldırırğa täqdim itte. Şunda ğına xatın-qızlar qoyaşta häm yäşellektä yal itä alaçaq. Älegä, qısqaraq külmäk yä tarraq kiem kiep uramğa çıqqan xatın-qızlarnı ählaq polisiäse qulğa ala.
