Başqortstan xakimiätläre başın ber oppozisiä köçläre genä awırttırmıy. Respublika parlamentındağı öç deputat üz mandatların tapşıruı xaqında iğlan itte. Alar fevral azağında parlament spikerı Tolkaçevnı urınınnan alunı oyıştıruda ğayeplänüçelär dip belderelä. Räşit Möxetdinov, Rinat Tuxtiev häm Leonard Sadıyqov üzläreneñ bu adımın respublika citäkçelegen yarsıtmaw niätennän çığıp eşlägänlegen belderä. Yağulıq-energetika kompleksına qarağan şirkätlärneñ citäkçeläre bulğan bu deputatlarnıñ ber ük waqıtta prezidentnıñ ulı Ural Räximovnıñ yaqın tarafdarları buluı da bilgele. Aldağı könnärdä parlamenttağı tağın berniçä deputatnıñ, aları da Ural Räximov keşeläre dip äytelä, şulay uq deputatlıqtan waz kiçärgä cıyınuı mäğlüm. Bu xaqta comğa könne Başqortstan Däwlät cıyılışı matbuğat üzäge xäbär itte. Başqortstan prezidentı Mortaza Räximovnıñ respublika baylığınıñ küp öleşen üz qulında totqan ulı Ural Räximov belän araları bozıluı xaqında kön sayın yaña xäbärlär kilä. Bäysez mäğlümat çaralarında bu turıda törle imeş-mimeşlär kön dä dönya kürgäç, alarnıñ qaysısına ışanırğa da belmässeñ. Şulay da qayber täğayın xällär ata belän ulı arasındağı bu köräşneñ çınlap ta kiskenläşüenä işarä bulıp tora. Ural Räximov qaramağındağı «Başneft» berläşmäseneñ Tuymazı, Bäläbäy, Okyyabrskiy şähärlärendäge şirkätläre eşçeläre häm xezmätkärläre, üzlärendä başlanğan üzgärtep qorularğa qarşılıq yözennän, şimbä könne zur uram cıyınnarı oyıştırırğa qarar itkän. Mäğlüm buluınça, neft çığaru häm eşkärtü tarmağındağı soñğı üzgärtep qorular Mortaza Räximovnıñ yağulıq-energetiqä şirkätlären qabat däwlät qaramağına qaytarırğa digän kürsätmäsennän soñ başlanğan ide. Şulay itep, respublikadağı oppozitsiä köçläre safları aldağı könnärdä küp meñlägän eşçe xalıq wäkilläre belän dä tulılanır kebek.
