25 oktäberdä, Mäskäwdä, Rusiäneñ federatsiä şurasında “Rusiä töbäkläre üseşe strategiäse, täcribä häm kiläçäk” digän temağa tügäräk östäl ütte.Häm bu tügäräk östäl tulısı belän Tatarstanğa bağışlanıp, Qazannıñ meñ yıllığı bäyräme qısalarında ütä dip, bilgelände. Bu oçraşuğa Qazannan 60 keşelek delegatsiä kilgän bulğan. Tügäräk östäl utırışında Mäskäwdän dä baytaq qına zıyalılar qatnaştı. Alar arasında Tatarstannıñ wäkälätle wäkile Nazif Mirixanov, “Supr” şirkäte citäkçese Azat Wäliev, akademik Qamıl Wäliev tä bar ide. Ä menä armiä generalı Mäxmüt Gäräevkä, cırçı Renat İbrahimovqa, yazuçı Rawl Mirxaydarovqa Tatarstannıñ däwlät cıyılışı räise Färit Möxämätşin, Qazannıñ meñ yıllığına bağışlanıp maxsus eşlängän medal’lär dä tapşırdı.
Oçraşunı Federatsiä şurası räise Sergey Mironov açıp cibärde. Tatarstan yağınnan sälämläw süzen Färit Möxämätşin äytte. Ä ğomumän bu oçraşu xaqında Färit Möxämätşin bolay dide:
Qazannıñ meñ yıllığı bik matur uzdı. Prezidentlar belän dä oçraşu buldı. Sammit ta ütkärdek. Ä menä Federatsiä şurasındağı bu oçraşu bik kiräk ide. Çönki könläşälär Tatarstannan. Bezgä aqça küp kitä dip söylilär. Läkin bez alar birgän ber tien yanına, üzebezneñ tağın öç tienne quşıp yasadıq bu bäyrämne. Şul turıda da äytü kiräk ide,- dide.
Tügäräk östäldä çığış yasawçılar küp buldı. Alar arasında Tatarstannıñ iqtisad ministrı Boris Pavlov, Qazan şähäre başlığı urınbasarı Rafis Ğosmanov. Alabuğa şähäre xakimiät citäkçese İlşat Ğafurov, Tatartstannıñ tözeleş, arxitektura häm toraq xucalığı ministrı Marat Xösnullin da bar ide. Şulay uq Federatsiä şurası äğzäläre dä Qazan turında üz fikerlären äytergä omtıldılar. Mäsälän Federatsiä şurasınıñ cirle üzidarä komitetı citäkçese Roketskiy, Qazannıñ meñ yıllıq bäyrämendä buluın söyläp, Qazannıñ maturlığın maqtap alğannan soñ, “Qazan yätime” digän töşençägä Qazannan añlatma da alıp qayttım. Süz ğomumän yätimnär turında tügel bu oçraqta. Baybiçälär Mäskäwgä kilep, meskenlänep aqça sorağannan kilep çıqqan ikän ul – “Qazan yätime” digän süz, dip tämamladı çığışın. Bu süzläre belän ul närsä äytergä telägänen añlaw qıyın tügel, läkin añar qarşı süz äytüçe bulmadı. Min bu xaqta, oçraşuda qatnaşqan yazuçı, Tatarstan Däwlät şurası äğzäse Razil Valievqa möräcäğät itep. Raketskiynıñ çığışı belän kileşäseñme dip soradım. Räzil Wäliev bu fiker belän kileşmägänlegen belderde. Häm “Qazan yätime” digän töşençäneñ qayçan kilep çığuın añlattı.
Tügäräk östäl Rusiä töbäkläreneñ üseşenä bağışlanğan ide dip äytkän idem. Süz toraq yort, yaña küperlär, awıl, şähär üseşe belän genä çiklände. Ä menä çığışlarda tel üseşe, xalıqnıñ mädäniäte, ruxi, milli añı turında ber süz dä bulmadı. Älbättä, bu tügäräk östäl Qazannıñ 1000еллыгына bağışlanğan bäyräm çaralaranıñ ber çağılışı ğına. İke säğät däwamında barğan tügäräk östäl eşendä çığış yasarğa teläwçelärneñ barısı da qatnaşa almıy da qaldı. Bälki şundıy forsattan faydalanıp, bu xaqta da äytergä kiräk bulğandır.
Mäskäwdä, Federatsiä şurasında Qazanğa bağışlanğan çaralar äytep ütelgän tügäräk östäl belän genä çiklänmäde. 26 oktäber könne anda Tatarstan rässämnäreneñ räsem häm fotokürgäzmäse açıldı .Ayırım kürgäzmädä şulay uq tatar xalqınıñ kömeştän yasalğan bizänü xäzinäläre, käläpüş häm arça çitekläre, milli kiemnär dä quyılğan ide. Qazannıñ meñ yıllığına bağışlanğan bu çarağa kilüçelär Tatarstan sänğät ostaları konsertın da qaradılar.
Näzifä Kärimova, Mäskäw.
