Өлкәнең мәдәният, яшьләр һәм спорт министрлыклары һәм Дуслык йорты тарафларыннан тормышка ашырылучы күпъеллык максатлы програм кысаларында ике елга бер тапкыр төрле милләт балаларын “Каенлык” савыктыру аланына җыялар.
Балаларга мондый ял оештыруның максаты, беренчедән, балалар һәм яшүсмерләр арасында толерантлык тәрбияләү өчен яхшы мәдәни-социаль шартлар тудыру, икенчедән, өлкәдә яшәүче төрле халыкларның мәдәниятләре белән таныштыру һәм күпмилләтлелек рухында тәрбияләү, һәм, өченчедән, яшьләр арасында этник сәбәпләр аркасында экстремизм, дошманлык хисләре тудырмаска, тәртип бозулар булдырмаска.
Өлкә үзәгеннән 135 чакрым ераклыкта, табигатьнең матур бер урынында урнашкан бу ял аланында беренче мәртәбә төрле милләт балаларын 2006 елда җыйганнар иде. Аннан соң 2008, 2010 елларда балаларга тагы бәхет елмайды. Һәм быел “Каенлык” аланы дүртенче мәртәбә төрле милләт балаларын кабул итте.
Анда хәзер өлкәнең сигез районыннан 250 бала ял итә. Алар арасында 20 бала татарлар, сигезе Омски шәһәр мохтарияте каршынында эшләүче «Өмет» студиясеннән һәм 12 бала – өлкәнең Тара шәһәрендә эшләүче “Якташ” балалар клубыннан. Калганнары урыс, украин, белорус, әрмән, яһүд, казакъ һәм башка милләт балалары.
Татар балалары барысы да бергә түгел, ягъни, «Өмет» һәм «Якташ» балалары төрле төркемнәрдә. Һәр төркемдә 3-4 милләт баласы, алар аны сизмиләр дә, бергә уйныйлар, ял итләр, ди тәрбиячеләре Наталья Князева.
“Каенлык” аланына ял итүчеләр өчен “Балачакның якты төсләре” дип исемләнгән милләтара фестиваль оештырыла. Фестиваль кысаларында өлкәдә эшләп килүче милли-мәдәни оешмаларның иҗат коллективлары катнашында милли мәдәниятләр көннәре үткәрелә, милли спорт уеннары, этнокомпонентлы уеннар кертелгән концертлар, башка төрле чаралар оештырыла.
Омски балалары милләтара аланда ял итә
Өлкәнең мәдәният, яшьләр һәм спорт министрлыклары һәм Дуслык йорты тарафыннан тормышка ашырылучы күпъеллык максатлы програм кысаларында ике елга бер тапкыр төрле милләт балаларын “Каенлык” савыктыру аланына җыялар.
Балалар янына алман, яһүд, әрмән, казак, корея, латыш, казакъ, чуаш мәдәният үзәкләреннән килделәр, һәрберсе үзләренең җырлары, биюләре, йолалары, уеннары белән таныштырды, балаларга ошый, актив катнашалар, ди Наталья Князева.
Июль аеның соңгы көннәрендә үткәрелгән милли мәдәниятләр көнендә шәһәр татар мохтарияте, казакъ һәм кытай мәдәният үзәкләре катнашты. Әлеге оешмалар активистлары аланда ял итүче балаларны үзләренең җыр-биюләре белән таныштырдылар, бергәләп милли уеннар уйнадылар, спорт ярышлары үткәрделәр.
Әлбәттә, таныштырып, уйнатып кына калмадылар, беръюлы һәр уенның мәгънәсен аңлаттылар, биюләр өйрәттеләр. Татар мохтариятенең яшьләр оешмасы җитәкчесе Наилә Абдулина Кырым татарлары биюен күрсәтте, хәрәкәтләренең мәгънәсен аңлатты.
Наилә белән “Умырзая” ансамбле биючесе Раиф Ногманов Сабантуй уеннары уйнаттылар, балалар татар көйләре астында капчык киеп тә, сулы чиләк-көянтә белән дә йөгерделәр, аркан тартыштылар, чүлмәк ваттылар.
Балалар бу көнне тагы әрмән һәм яһүд биюләрен өйрәнделәр, казакъларның туй йоласы белән таныштылар. Оештыручылар – өлкә мәдәният министрлыгы хезмәткәрләре фикеренчә, мондый чаралар төрле милләт балаларын берләштерә, дуслаштыра, башка төрле гореф-гадәтле, мәдәниятле кешеләрне аңларга, кабул итәргә ярдәм итә.
