Сами Йосыф концерт барышында тамашачыны саф татар телендә сәламләп, "Ураза гаете мөбәрәк булсын! Казанда булуыма мин бик шат. Мин сезне бик яратам, Аллаһ бәрәкәт бирсен!" дип бәйрәм белән котларга да онытмады.
Сами Йосыф бер сәгать буена тамашачыны үзе иҗат иткән җырлар белән сөендерде. Җырларын "җанлы" башкарган артистның чыгышлары төрек, гарәп, инглиз телләрендә барды. Аңа, мәйданны тутырган тамашачы да кушылгалады.
Танылган артист концерттан соң Татарстан журналистлары белән дә тиз генә очрашып алды. Татарстанны, Казанны бик ошатуын белдергән Сами Йосыф бигрәк тә Кол Шәриф мәчетенә таң калун әйтте.
"Татарстанда төрле дин вәкилләренең бергә тыныч яшәве бик куанычлы күренеш. Бу бар дөньяда шулай булырга тиеш дип уйлыйм. Татарстанда тамашачы мине шулай җылы кабул итәр дип уйламаган идем. Бу хәл мине бик сөендерде һәм дулкынландырды да. Оештыручыларга бик зур рәхмәт. Кабат Татарстан, Казанга килергә теләр идем", дип белдерде ул.
Көчле иминлек чаралары күрелгән концерт тыныч үтте. Иганәчеләрнең ярдәме белән Татарстан мөфтияте оештырган гает концертына керү бушлай булды.
Фотогалерея:
Сами Йосыф Казанда меңләгән тамашачы җыйды
9 августта Камал театры каршында Ураза бәйрәме уңаеннан Британиянең танылган мөселман автор-башкаручысы Сами Йосыф чыгыш ясады. Ислам дәүләтләрендә популяр рок-башкаручының бу Русиядә беренче чыгышы иде. Бәйрәм чарасын Татарстанның диния назарәте оештырды. Сами Йосыф сәхнәгә чыгар алдыннан “Нәшидел-Ислам” төркеме, Ильяс Халиков дини җырлар башкарды. Тамаша карарга меңләгән кеше килде, бигрәк тә мигрантлар мөхтәрәм кунакны алкышлап-шаулап каршы алды.
