"Азатлык" татар яшьләре берлеге Хәтер көне символын тәкъдим итте. Ул Сөембикә манарасы рәвешендә тезелгән төрле сүзләр һәм сүзтезмәләр үрмәсеннән гыйбарәт.
Сөембикә манарасын тәшкил итүче сүзләр арасында "1552. Татар! Онытма! Оныттырма", шулай ук "татар иле", "милләт", "көрәш", "суверенитет", "бердәмлек", "уяну", "ризасызлык" дигән гыйбарәләр бар, шулай ук Шиһабетдин Мәрҗани, Йосыф Акчура, Гаяз Исхаки, Садри Максуди кебек мәшһүр мәгърифәтчеләрнең, Күчем хан, Олуг Мөхәммәд кебек ханнар, Батырша, Сәет Батыр, Түләкәй кебек халык каһарманнарының исемнәре китерелгән.
Бу символ белән төрле эшләнмәләр: футболкалар, чынаяклар, ябыштыргычлар, кечкенә банерлар ясалган. Дизайн авторы – Гөлчәчәк Хисмәт.
"Азатлык" берлеге җитәкчесе Наил Нәбиуллин әйтүенчә, бүгенге көндә татарга аның тарихын күрсәтергә кирәк. 1552 елның октябрендәге фаҗигале вакыйгаларга багышланган матәм чаралары үткәрү мөмкин булмаган шартларда да Хәтер көне турындагы мәгълүматны төрле юллар белән халыкка таратырга омтылырга кирәк, дип аңлатты ул Азатлыкка.
"Тарихыбызның төп сәхифәләре турында сөйләргә кирәк. 1552 елның октябре - татар тарихында иң мөһим борылыш булган чорларның берсе. Шуңа күрә безнең бурычыбыз – Казан ханлыгы башкаласының каһарман яклаучылары турында сөйләү, шулай ук үз тарихыбызны өйрәнергә омтылу, үз халкыбызга мәхәббәт тәрбияләү", ди ул.
Нәбиуллин халыкка тарихын искә төшерү мөһим дип саный, татарлар аны онытмаска, горурланырга, киләчәк буыннарга тапшырырга тиеш ди.
"Без тәкъдим иткән Хәтер көне символына һәр татар өчен иң кодрәтле, иң мөһим сүзләр җыйналган. Татар тарихын өйрәнүгә яңа этәргеч бирергә телибез. Яңа символлар һәм төрле чаралар ярдәмендә татар халкының тарихын, Хәтер көнен ватандашларыбызның шактыена җиткерә алачагыбызга ышанабыз", ди Нәбиуллин.
Октябрь ае дәвамында "Азатлык" татар яшьләре берлеге "Хәтер көне 2022" тамгасы бастырылган футболкалар, чынаяклар, ябыштыргычлар, баннерлар, кәгазьләр таратачак. Наил Нәбиуллин белдерүенчә, берлек ел саен Хәтер көненең яңа символларын булдырырга ниятли.
Узган ел "Азатлык" татар яшьләре берлеге Татарстан президенты Рөстәм Миңнехановка мөрәҗәгать җибәргән иде. "Тарихны халыкның исенә төшерү һәм һәрдаим яңартып тору" өчен берлек Хәтер көнен рәсмиләштерергә һәм октябрьне "Хәтер көне" буларак "Бәйрәм көннәре һәм истәлекле даталар" турындагы Татарстан канунына кертергә тәкъдим итте.
🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!
