İnternetta ütkärelgän «Yıl tatarı»n saylaw bäygese tämamlandı. 1 ayğa yaqın waqıt tatarlar.ru internet säxifäsendä tawış birü bardı. İnternetçılar, ütkän yılda iñ zur eşlägän, millätkä fayda kitergän proyektlarnı, ayırım şäxeslärne sayladı. İnde «Tatarlar-2005» bäygesendä ciñüçelärneñ isemnäre bilgele buldı. Alar arasında Zäydäge jurnalist Gamira Ğadeşina häm Çallıdağı milli xäräkät wäkile Tälğät Äxmädişin bar. 2005 yıl tatarın saylaw inde ber niçä yıl rättän ütkärelä. Yıl däwamında bulğan waqiğalarnı barlap çığu, uñışqa ireşkän, zur tırışlıqlar quyğan keşelärne barlaw eşen Amerikadağı Sabircan Bädertdin, Mordoviädäge İrek Bikinnin häm başqa entuzasitlar başlap cibärgän ide. Törle yıllarda, bäygedä tenisçı Marat Safin, yawlıq kiep pasport räsemenä töşügä röxsät alu öçen köräşkän möselman xatın-qızlar häm başqalar ciñgän ide. Ütkän 2004 yılda, «Yıl tatarı» iseme öçen tawış birüdä, Fändäs Safiullin häm dönyada keçkenä qızlar arasında çibärlek bäygesenä ciñüçe Daniä Ğöbäydullina «Yal tatarı» isemen aldı. Bıyılğı bäygedä ciñüçe itep Tälğät Äxmädişinnı, jurnalist Gamira Ğädelşinanı, Räfis häm Näfis Kaşapovlarnı, Rinat Bekkinı da atap bula. Bıyl «Yıl tatarı» bäygese, başqa isem astında - «Tatarlar -2005» dip ütkärelde. Bıyılğı bäygeneñ üzençälege tağın şunda : iñ-iñ aqıllı, iñ eşlekle tatarlar arasındağı yarış berniçä yünäleştkä bülep ütkärelde. Mäsälän, yılnıñ tatar at-atı häm tatar qızı ğına tügel, tatarlarnıñ xezmättäşlege, duslığı, İnternettağı eşçänlege häm tatarlardan qurquçı tatarofob da bilgelände.
İnternetçılar ütkän yılnıñ iñ istälekle waqiğaları, iñ danlıqlı şäxesläre itep närsäläre häm kemnärne sanıylar, şuşı bäygegä qarap, çamalap bula. Mäsälän «Tatarlar-2005» digän bäygedä , şundıy waqiğalar häm şäxeslär bar: Qazannı böten dönyağa tanıtqan 1000 yıllıq bäyräme häm anıñ öçen tırışlıq quyğan Kamil İsxaqov, Rusiä imperiäse tarixında iñ yuğarı urın aluğa ireşkän tatar çinovnigı Raşid Nurgaliev, Petr 1 häykälen quydırmaw öçen köräş häm anı alıp barğan Yunıs Qamaltdinov, Tatar ictimaği üzägeneñ Kulikov qırındağı orışnı bäyräm itügä qarşı çığuı, Möselman Kino festivale ütüe häm anı oyıştıruğa üz öleşen kertkän möfti Rawil Ğäynetdin, şulay uq, «Qol Şärif» mäçete yanınnan sıraxanäne aldıru häm aña ireşkän möselman xatın qızlar oyışması citäkçese Almira Adiatullina, tatar äsärlären alman telendä bastırıp çağaru häm bu eşne başqarğan Aliä Taysina, cırçı Zölfiä Kamalova yaña cır cıyıntığı çığuı, Guantanomo törmäsendä tatarlarnıñ utıruı, İnternetta tatarlarnı tanıtu yünäleşendä eş alıp barğan Aynur Sibgatullin, Ruzil Möxetdinov, Renat Bekkin häm başqalar bar.
Tawış birü 1 ayğa yaqın waqıt bardı. Fikerlären belderergä teläweçlärgä, tawış birep kenä tügel, üz nämzätlären täqdim itä aldı. Şulay itep isemleklär tözelde, tawışlar birelde, ciñüçelär bilgelänä başladı. Bäygeneñ tatar-2005 digän yünäleşendä, Ukraindağı üzgärtep qorularğa teläktäşlek kürsätü aksiäsen oyıştırğan öçen Tälğät Äxmädişin ciñüçe itep tanılğan. Anıñ öçen 2368 tawışnıñ 6 % birelgän. Bu iñ yuğarı ball. Tälğat Axmädişin, Peter 1nçe häykälen quydırtmawğa ireşkän Yunıs Qamalıtdinov häm bik küp pyesa avtorı Tufan Miñnullinnı tawışlar sanı belän uzıp kitkän. Bäygeneñ «Tatar qızı 2005» digän yünäleşendä, tawışlar sanı belän Äläzän tatarları tormışın obyektiv yaqtırtqan öçen «Respublika Tatarstan» gäziteneñ Zäydäge üz xäbärçese Gamira Ğädelşina ciñgän. Ul, «İzvetsiä» gäzitendä basılğan, qara töslärgä buyalğan mäqälädän soñ, başqa tatarstan jurnalistları belän bergä Äläzängä barıp, andağı xällärne törle yaqlap surätläp birgän. Bu mäkälä, uquçılarnıñ iğtibarın nıq cälep itkän yazmağa bulğan. Gäzitneñ internet säxifsendä mäkälädän soñ, fiker belderülär bardı. Gamira Ğädelşinağa 817 tawışnıñ 15% birelgän. 2005 yılnıñ «iñ ataqlı tatarları» digän yunäleşendä, iñ küp tawışnı Räfis häm Näfis Kaşapovlar alğan. İnternetta, tatarlarnı tanıtuğa zur öleş kertkän keşelär arasında, Rinat Bekkin isemle, islam belgeçe häm 2 islam saytın yasağan keşe çıqtı. Ä tatarlardan qurquçı, tatarofob şäxeslär arasında iñ küp tawış Başqortstan Prezidentı Mortaza Rahimov öçen birelgän. Bu şäxes öçen 99 tawış belderelgän. Mortaza Rahimov belän bergä bu isemlektä, Rus pravslav çirkäw başlığı Aleksiy İİ, tatarlarğa qarşı yünältelgän mäqkälär bastıruçı İzvestia gäzite, galim valeriy Tişkov häm başqalar bar.
Bıyılğı bäygene oyıştırğan tatarlar.ru saytı, här yunäleştä ciñgännär ayırım büläklänäçäk , dip wäğdä itä. Ä «Tatarofob» yünäleşendä berençe urınğa çıqqan şäxes, başqalardan ayırım waqıtta häm üzençälekle formada büläklänäçäk. Bikä Timerovañ
