Anı ozatu mäclesendä Rämilne ölkänräk iptäşläre “stariklar” belän urtaq tel tabu ısulları belän tanıştırğannar. Läkin ätise Rawil: “Minem ulım, minem kebek ük taza, kimsetügä yul quymas”, dip äytkän. Arxangel'ski ölkäsendäge mäğlüm poligonnıñ uqu-öyränü çastendä xezmät itkändä ätise, anda barıp, bik qänäğät bulıp ta qaytqan.
Rämil, uquın tämamlap, İvanovo ölkäsenä küçerelgäç, äti keşe şatlanğan da: imeş, yaqınraq buldı, yışraq oçraşırbız. Läkin “lineynıy” çast'lärdä 100 könlek ikençe “uqu-öyränü” dä bar ikän şul: “stariklar” aldında tez çügärgä, bulğan aqçañnı alarğa “büläk itärgä” öyränü.
Qinaluı turında xäbär alğaç uq, Rawil, qızı belän bergä, ulı yanına aşqına. Tizräk barıp citü öçen, Çabaqsarğa qädär taksida bara. Ata keşene iñ aptıratqanı - polk komandirınıñ tupaslığı, keşene çüpkä dä sanamawı. Läkin Rawil äfände bu yäş polkovniknı tiz urınına utırtqan. Çönki, di ul, berdän-ber ulım xarap bulsa, üzemneñ yäşäyeşemneñ mäğnäse dä qalmıy. Berdän-ber yuğaltır närsäm dä – ul ğına. Yomşara töşä polkovnik. Küreşergä röxsät birgän, läkin soldatnı kön buyı ätise belän oçraşırğa äzerlägännär.
Urologiä yağınnan citdi cäräxätlär alğan buluına qaramastan, soldatnı gospital'gä cibärmägännär, iñ zur tabibı fel'dşer bulğan sançast'tä genä totqannar. Äti keşe äytüençä, ülem cäzasına xökem itkännär, bulıp çığa.
Şöker, di Rawil. Gospital'gä urnaştıra alğan. Ä bu oçraqta inde cäräxätlärne yäşerep bulmıy. Barısı da dokumentlaştırılğan.
Rawil Aymetdinov fikerençä, soldatlar çitlekkä yabılğan cänlek xälendä. Arimiädän tış, sine qinasalar, qaçıp qotılıp bula, “qarawıl” qıçqırıp bula. Ä armiädä berni dä eşli almıysıñ: absolyut xoquqsızlıq! Ramil dä tabiplarnıñ: “Närsä buldı siña”, - digän sorawına “yığıldım” dip kenä cawap birergä xoquqlı bulğan. Tik gospital' tabibı belä inde eşneñ närsädä ikänen.
Soldat anaları komitetında äti keşegä bu eşne prokuraturağa citkerergä täqdim itkännär. Rawil älegä uylana: ulıma tağın da zurraq naçarlıq eşlämäslärme!
Armiädäge xoquqsızlıqnıñ çige yuq. Äytik, Semberdä urnaşqan 31-Hawa desant brigadasında xezmäten tämamlarğa 3 ay qalğan Başqortstan yegete asılınıp ülgän, dip xäbär taratqannar ide. Rawil moña ışanmıy. Çınlap ta, 3 ay ğına qalğaç, bu mesken üze dä “starik” bit inde. Dimäk, stariklar arasında da tulı buysınuçanlıq fizik köç belän tä'min itelä, dip uylıy armiädä imgätelgän yegetneñ ätise.
Ayrat İbrahim, Sember.
