Bitum häm awır neft’lärne eşkärtü mäs’äläse, Tatarstan öçen ayıruça möhim, dielde xalıqara seminar turındağı matbuğat oçraşuında. Respublika Fännär Akademiäseneñ yaña prezidentı häm fänni-tikşerenü institutı başlığı Äxmät Mäzğärov awır neft’lärne eşkärtü östendä çınlap torıp eş başlaw waqıtı citte, dide. Çönki dönya bazarında neft bäyäse üsä tora. Bu könnärdä Qazanda ütä torğan xalıqara fänni- seminarda, neft’ne eşkärtü texnologiäläre genä tikşerelde älegä. Äxmät Mäzğärovnıñ äytüenä qarağanda, Tatarstannıñ neftne ciñeläytüdä fänni uñışları bar, ämma Fransiä ğalimnäre bu yünäleştä alğaraq kitkän, şuña kürä, bu eştä fänni cämäğätçelekkä bergäläp eşlärgä turı kiläçäk, dide Äxmät Mäzğärov. Fännär Akademiäsendä xäzer nefte-ximiä insitutlarına ğına östenlek birelerme, digän sorawğa yaña saylanğan prezident bolay cawap birde.: « Tatarstan byudjetı neft, netf-ximiäsennän tulılanıp kilä, şuña kürä bu problemalar Fännär Akademiäsendä dä, berençe,ikençe urında torırğa tieş. Ämma, anıñ belän genä humanitar fännärne dä onıtırğa cıyınmıybız, islam, islamnnan qurqu problemaları xäzer bik aktual. Üzem nefte-ximik bulsam da, fänneñ başqa yünäleşlärenä dä iğtibar birergä cıyınabız». Humanitar fännärneñ ähämiäten yaña prezident «Watanım Tatarstan» gäzitenä birgän äñgämäsendä dä bilgeläp ütä. Anda ul, tatar telen, ädäbiäten, tarixın häm mädäniäten öyränügä ixtiac bar di. Anı, bezdän başqa ber kem dä öyränä almıy, tatar mädäniäten dönya däräcäsendä tanıtırğa kiräk, di ul. Fännär Akademiäsen üzgärtep qoru tärtibe turında yaña prezident Äxmät Mäzğärov bolay dide.: «Rusiä fännär Akademiäsendä dä üzgärtep qorular bara, bezneñ Akademiä şunıñ misalında tözelgän. Bezgä Akademiäneñ üzgärtep qorırğa waqıt citte. Bulğan bazada, respublikağa faydalı yünäleşlärne köçäytergä, tözeleşen üzgärtergä kiräk. Soñğı yıllarda Akademiä eşlärendä tuqtalıp toru küzätelde, metro tözeleşe barğanğa kürä ğalimnär, üz binasınnan, Kreml’gä, bik qısan bülmälärgä küçep tordı. Bu da anıñ eşenä tä’sir itte. Xezmätkärlärne qısqartu bulmıy, bezeñ Akademiä bik keçkenä, 35 akademik, 60 möhbir-äğzä, 7-8 institutıbız bar. Eşne yaxşırtu, näticälelekne arttıru maqsatların quyabız.» Äxmät Mäzğärov yaña wazifada, berençe eşlärneñ berse itep, fänni xezmätkärlärneñ eş xaqların kütärerğä wäğdä itä. Xäzerge waqıtta Rusiädä häm Tatarstandağı fänneñ xälen ul bik möşkel dip bäyäläsä, berniçä yılda dönya däräcäsenä çığarlıq mömkinlelegebez, bar dip belderä Äxmät Mäzğärov.
Bikä Timerova
