Küptän tügel, elemtä, mäğlümatlaştıru ministrlığı 2005 yıl näticälären iğlan itte häm aldağı 2006 yılğa bulğan plannarı belän büleşte. Ministr Färit Fazılcanovnıñ çığışında, Tatarstan internet qullanuçılar sanı 38% artqan häm 230 meñgä citkän dielä. Waqıtqa sanağanda, İnternetnı ber säğät qullanu urtaça 14 sum tiräsendä bulğan, ä mäğlümatnıñ külämenä qarap sanağanda, 1 megabayt 2 sum 8 tiengä satılğan. Elemtä ministrlığı, aldağı yalğa «Elektron Tatarstan» digän proyektnı tormışqa aşırunı küz aldında tota. Bu «Elektron xökümät», ministrlıqlar, cawaplı oyışmalar turında, ğlobal çeltärdä mäğlümat tabu, alarğa möräcäğät itü, tiz arada cawap alu digän süz. 2006 yılda, internetqa totaşu urınnarınıñ sanın artırırğa wäğdä itelä. Belgänegezçä, andıy global kompyuter çeltärenä totaşu urınnar, sanaqlar poçta häm elemtä büleklärendä urnaştırıla. Şulay uq, Elemtä ministrlığı tellär turındağı qanunnı tormışqa aşıru yünäleşendä eşlägän proyektlar turında da xisap tota. Ministrlıq bıyıl Linux sistemasın, poçta belän häm internetta eşläwçe quşımta programmalarnı tatarçağa tärcemä itü turında maqtana ala. «Bu programmalar, mäğlümat texnologiäläre bazarında berençe tatar produktları buldı. Alar bar keşelärgä tatar telen öyränergä häm qullanırğa mö’minlek biräçäk, andıy tatarçalaştırılğan produktlarnıñ barlıqqa kilüe çittäge tatarlar öçen ayıruça möhim, dip belderä elemtä häm İnformatizatsiä ministrı. 2006 yılda, Windows XP sistemasın da tatarçalaştıru eşen tämamlanaçaq, dip äytelä Färit Fazılcanivnıñ çığışında. Tulı notıq, ministrlıqnıñ internet säxifäsendä www.mcrt.ru saytında elengän. Tatar yazuçısı Marat Käbir, üzeneñ äsärlären internet aşa tarata. Bu üzenä kürä yañalıq tügel, çönki yazuçınıñ internet säxifäse elek tä bar ide. Bu könnärdä, yazuçınıñ kitapların sata torğan internet säxifä açıldı. «Tatar ile» dip atala ul. Adresı - http://netne.by.ru İnternet kibetlär üzenä kürä yaña äyber tügel. Muzıka satuçı www.tatshop.ru, disklar, kitaplar täqdim itüçe kibet.net digän säxifä bar. Bu «tatar ile» internet kibete, tatar internetı öçen yaña äyberne, audio-kitapnı täqdim itä. Avtor belän äñgämäne, audio-kitaptan ber özekne tapşıruıbıznıñ aldağı çığarılışlarında tıñlarbız
Bikä Timerova
