Älbättä, alarnıñ kübese Musa Cälilneñ 100 yıllıq yubileyına bağışlanğan ide. Mäktäple här tatar awılında oyıştırıldılar alar. Qayberlärendä ayıruça kiñ qolaç belän. Mäsälän, Nikolaev rayonı Tatar Saymanı awılındağı çarada kürşe-tirä tatar awılları wäkilläre häm rayon Mäğärif idaräse citäkçese dä qatnaştı. Mäktäpneñ üzeşçän teatr kollektivı citäkçese Klara Karnauxova bik tirän eçtälekle tamaşa äzerlägän. Xätta “Altınçäç” operasınnan özeklär dä yañğırağan.
Ä ölkä üzägendä isä böyek şäxes yubileyına zur iğtibar birelde, dip bulmıy. 9, 55 häm 68 mäktäplärdä ana telen öyränüçe balalar öçen genä oyıştırıldı. Ä 15 häm 28 mäktäplär balaları “İdelbuyı xalıqları kitapxanäse” xezmätkäre Gölfiä Xäliullova oyıştırğan çarada qatnaştılar. Döres, üzläre dä Cälil şiğerlären yatlap kilgännär, şulay uq viktorinada aktiv qatnaştılar. “Tuğan tel” aktivistları da çığışlar yasadılar, cırlar başqardılar.
İlbaşı Putin Musa Cälilneñ 100 yıllığın Bötenräsäy xalqı bäyräme dip iğlan itkän ide. Läkin Semberdä başqa xalıqlarnıñ bu bäyrämgä iğtibarı işetelmäde, kürenmäde. “Ömet” gäzitennän başqa mäğlümat çaraları da bitaraf qaldılar. Mondıy ğomumküreneştän barı tik Dimitrovgrad şähäre genä çığarma bulıp tora. “Wosxod” isemle mädäniät sarayında uzğan zur cıyılış häm bäyräm konsertında märtäbäle räsmi citäkçelär dä qatnaştılar: Ölkäneñ Mäğärif häm sotsial' üseş ministrı Tamara Dewyätkina, gubernatornıñ milli häm dini mäs'älälär buyınça yärdämçese Tat'yana Sergeeva, şähär merı urınbasarı Valentina Karaulova.
Anda şulay uq Bötendönya Tatar Kongressı Başqarma komitetı wäkilläre dä çığış yasadılar, “Yaña ğasır” telekanalı xezmätkärläre dä bu tantana belän qızıqsındılar.
Kilep citkän xäbärlär buyınça, Dimitrovgradnıñ barlıq mäktäp-kitapxanlärendä dä Cälilgä bağışlanğan çaralar uzğan.
Ölkä üzägendä iñ soñğı çara filarmoniä zalında buldı. Tik tamaşaçı bik az ide. Xäyer, monısı ğäcäp tä tügel – Tatar mädäni üzäge oyıştırğan çaralarğa xas küreneş. Şulay da fevral' 22дә Yäşlärneñ yal üzäge isemen yörtkän Mädäniät sarayında uzğan zur konsert bu qağidädän çığarmaday qabul itelde. 1100 keşe sıyarlıq zal yartılaş diärlek tulı ide. “Sember yoldızları” konsertına çaqırğan iğlanda ölkäneñ iñ tanılğan 13 cırçısı häm Tatarstan, Çuaşstan sänğät ostaları da qatışaçaq, dielgän ide. Läkin isemlektä atalğan barlıq cırçılar da qatnaştı dip bulmıy. 275 çaqrım yıraqlıqtağı İske Kulatkı cırçılarınıñ kilmäwe añlaşıla, ä menä Rimma Möxmmämtcanova, Ruzaliä Utkinalarnıñ bulmawı sorawlar da tudırdı. Şulay da Mäläkästän kilgän Fäniä Xäliullova belän Raziä Bildanova, elek Semberdä yäşägän Çüpräle yegete İlmir Altıynbaev kiçäne yarıysı ğına bizädelär. Ä Ul'yanov rayonı üzäge İşeevka qasabasında icat itüçe Älfiä Ramazanova häm anıñ “Aqbars” isemle balalar törkeme – tamaşanıñ kendegedäy qabul iteldelär. Konsert “Aqbars”nıñ kümäk cırı häm näni malay täqdim itkän “Ädrän diñgez”däp başlandı häm Älfiäneñ üz çığışı belän tämamlandı.
Şunısı da östäp äytergä kiräk. Älfiä Ramazanova yuq-bar tatarlı İşeevka qasabasınıñ Mädäniät yortında menä digän balalar kollektivı tuplağan. Ä 70 meñ tatarlı Sember qalasında andıy kollektiv turında xıyallanırğa ğına qala. Yuğisä, Sabantuylar säxnäläre könnär buyı üz teläkläre belän säxnägä çığıp cırlawçılardan buşamıy – sälätle cırçılar bik küp. Läkin Tatar Mädäni üzäge alarnı tuplawnı üz burıçı dip sanamıy, digän fiker dä yöri xalıq arasında.
İğlanda “Sember yoldızları” dip atalğan konsertnıñ mäğnäse häm maqsatı bäyän itelmägän ide. Tamaşa barışında anıñ “Sember cırı” festivaleneñ 15 yıllığına bağışlanğanı mäğlüm buldı. Yuğisä, Salix Säydäşevneñ 90 yıllığına bağışlap, “Tuğan tel” oyıştırğan berençe festival'neñ 3-turı 1990-yılnıñ dikaber başında bulğan ide. Dimäk, waqıtı bik ük turı kilmi. Ä menä fevral' 22 dä uzğan bu çarada ir-at xalqın Watannı saqlawçılar köne belän täbrikläwlär urınlı buldı kebek.
Häm soñğı süz. Uzğan atnanıñ mädäni çaralarınnan iñ kürkäme – Zäynäp belän Zöfär konsertı bulğandır. Bu parnıñ säxnägä çığuına 15 yıl tuluı uñayınnan tözelgän programma tirän tä'sirle buldı. Artistlarnıñ iñ populyar elekke cırlarınnan özeklärgä zal da quşılıp cırladı. Alıp baruçısı İlsur Mortazinnıñ mäğnäsez tupas “şayarışlarınnan” qotılğanlığın da tamaşaçı uñay küreneş dip bäyäläde.
Ayrat İbrahim, Sember.
