Ber xanım, milli xäräkät aktivistı, qızın Qazanda yäşäwçe yarıysı ğına milli canlı keşegä kiäwgä birde. Nikax mäclesenä tatar cämäğätçelege wäkilläre dä çaqırılğan ide. Mäclesne ölkädäge iñ abruylı din ähele möfti Fatıyx xäzrät Aliullov alıp bardı.
Mäcles barışında ul möselman ğailäsendä ir belän xatın arasındağı mönäsäbätlär, äxlaq nigezläre, bala tärbiäläw äsasları turında tirän eçtäşlekle wäğäz dä tottı. İldäge äxlaqsızlıq, tärtipsezlekneñ tatar-möselmanğa da ütep kerüe turında fiker alışu da buldı. Älbättä, araqı zäxmäte turında da.
Soñnan, yäş ğailäneñ araqılı tuy uzdırğanın işetkäç, Fatıyx xäzrät “Ägär monı aldan belgän bulsam, şulqädär süz äräm itmägän dä bulır idem”, - dip uftandı da.
İkençe ber nikax mäclesendä Yaña şähär mäxälläse imamı Möxämmät xäzrät Baybikov ta, Fatıyx xäzrätneñ şäkerte bularaq, şundıyraq wäğäz söyläde. Qızın yäräştergän ata keşedän: “Bälki xäzrätneñ süzlärenä qolaq salıp, araqısız tuy uzdırırsız?” dip sorarğa turı kilde. “Yuq, adäm kölderep bulmıy inde. Änä çın dini keşe Xanäfi abıy, zur başlıq ta äle, qızınıñ tuyın araqısız uzdırğan da bit, barıber qaçıp-posıp bulsa da, uramğa çığıp eçkälägännär”, di äti keşe.
Ä şulay da araqısız tuylar uzdıru mömkin ikän. Maltabar Nurğayaz Kamalov, mäsälän, şundıy tuy uzdırğanına bik tä qänäğät. Häm şöker, di, qunaqlarğa da bu tuy bik oşağan, bik qänäğät bulıp taralğannar.
Döres, aña da başta qarşı töşüçelär bulğan. Mäsälän, äniseneñ señlese, apa keşe, anı xätta qomsızlıqta da ğäeplägän: “Bayırsıñ inde araqığa aqça jälläp”, digän. Läkin Nurğayaz üzeneken itkän, häm tuy bik uñışlı uzğan. Tuynı alıp baruçı Çulpan milli cırlar belän sıylawdan tış, törle uyınnar oyıştırğan, xalıqnı cırlatqan, bietkän, xätta äxlaqi qağidälär buyınça sorawlar birep, bäyge dä oyıştırğan.
Nurğayaz äytüençä, tuy qunaqları arasında bu ürnäk tuy turında başqalarğa da citkerergä, häm şuşı täcribäne kiñräk qullanırğa teläk belderüçelär dä bulğan.
Ayrat İbrahim, Sember
