Xalıq üz aşqazanı öçen borçıla başlağan. Elek azıq-tölekne tışqı qiäfätenä, yäğni törelgän qagäzläre, bizäleşenä qarap alğan bulsa, xäzer närsädän yasaluına – sostavına iğtibar itä başlağan. Tatarstan awıl xucalığı häm azıq-tölek, şulay uq säwdä häm tışqı iqtisadıy bağlanışlar ministrlıykları, keşe xoquqların yaqlawçı oyışma wäkilläre qatnaşqan matbuğat oçraşuında şulay dip äytelde.
Şuña da qaramastan, öre säwdä kibetläre citäkçeläre çit ildän kergän tovarnıñ kübräk satıp alınuın, anıñ näq matur bizäleşle buluı belän añlatalar ikän. Häm citeşterüçelärgä tovarlarınıñ satıluların teläsälär, bu mäs'älädä taläpçänräk bulırğa kiñäş itälär.
Tatarstan säwdä häm tışqı iqtisadıy bağlanışlar ministrlığınıñ bülek citäkçese Valentina Popova misal itep Tatarstanda çığa torğan söt rizıqlarınıñ tışqı qiäfätläre soñğı waqıtta küpkä maturayuın, törlänüen äytte, häm satıp alu da arttı dip bilgeläp uzdı. Xätta awıldan kilgän sötne “Edel'veys” matur paketlarğa tutırıp kire rayon kibetlärenä qaytara. Dimäk yaqın kiläçäktä üzebezneñ qırlardağı bäräñge, çögenderlärne yuılıp matur itep tutırılğan kileş satıp ala başlarbız digän ömet bar. Älegä isä öre säwdä noqtaları çit il tovarların satunı qulaylıraq kürä ikän.
Şulay uq Tatarstanda biokibetlär buldırılır dip farazlana, yäğni barı üzebezdä eşlängän çista, tikşerelgän azıq-tölek kenä satılaçaq.
Tatarstanda citeşterelgän tovarlar xäzergä kübräk “Bäxetle” häm “Edel'veys“ kibetlärendä satıla dielde matbuğat oçraşuında. Häm alarda tovarlarnıñ sıyfatı da yaxşıraq dide keşe xoquqların yaqlaw Däwlät inspeksiäseneñ citäkçese urınbasarı Fännür Xammatov. Ä Mäskäw säwdä kibete bulğan “Perekrestok”, töreklärneñ “Ramstor” kibetlärendä qağidälärne bozu oçraqları terkälgänen assızıqladı. Qullanu waqıtı çıqqan tovarlar isemlegen sanap ütte.
Bilgele üzeñneke üzäktä digändäy, matbuğat oçraşuında qatnaşqan wäkillär Tatarstannıqı bulğan säwdä noqtaların gel yaxşı yaqtan ğına iskä aldılar. Törle Rusiä küläm bäygelärdä ciñep kilülären assızıqladılar. Çit ildän kertelgän azıq-tölekneñ kübese törle quşılmalar, konservantlar yärdämendä yasalğanı bilgeläp uzdılar. Matbuğat oçraşuında jurnalistlarğa da üpkäläw belderelde.
Valentina Popova
Bezneñ tovarnı xätta çit ildä dä kübräk häm yaxşıraq belälär. Respublikada citeşterelgän tovarnıñ sıyfatı turında kübräk mäğlümat birergä kiräk jurnalistlarğa. Bilgele bazarda üzebezdä citeşterelgän äyberlärne satu arta ğına bara häm bu yaxşı küreneş.
Yaqın kiläçäktä öre säwdä noqtalarındağı çittän kergän tovarlarnı respublikada citeşterelgännärgä almaştıru buyınça söyläşülär häm eş alıp barılaçaq dielde matbuğat oçraşuında.
Landış Xarrasova
