Watan suğışında qatnaşqannar häykäle yanında ütkän xäter kiçäsennän soñ xalıq awıl bäyrämen ütkärergä dip, naratlar arasındağı “Tölkelek” dip atalağan alanlıqqa, “Sabantuy”ğa cıyıldı. Monda här yıl da may başında ölkädä berençelärdän bulıp milli uyınnar, küñel açular uza. Elekke yıllarda bu bäyrämne 1 nçe mayda ütkärä idelär. Bıyıl isä, berençe may könne sinoptiklar hawa torışınıñ bik ük rätle bulmawın farazlağaç, xakimiät başlığı 9 na küçerde. Fäyzulla Kamalov süzlärençä, xäzer bit internetqa ğına kerep qarıysıñ. Anda hawanıñ nindi bulasın 10-15 kön aldan äytep quyalar. Yılğa ber tapqır bula torğan bäyräm xalıq küñelendä bäyräm ruxın alsın öçen könneñ cılı häm yañğırsız buluı da zur rol' uynıy. “Qar yawıp, yä yañğır qoyıp torğanda nindi bäyräm yasaw bulsın?!”,- di xakimiät başlığı Fäyzulla Kamalov.
Bu yazmabıznı tıñlawçılarda İnderäydä suqalap, çäçep beterdelär meni? Sabantuyğa da töşkännär digän, soraw tuğandır. Bu awılnıñ çäçülek cirläre dä, çaqrımnarğa suzılğan kötülekläre dä yuq. Xalıq ğömer-ğomergä İnderäy külennän taban balığın totıp kön kürgän.
İnderäy xakimiäte yıl da bäyrämgä awıl xalqı öçen ber zur büläk äzerli. Ütkännärendä 2 qatlı qızıl kirpeçtän mäktäp açıldı, ikençe qatı awıl tarixı muzee bulğan xakimiät binası qorılıp bette, awılğa asfal't cäyelde, su kerde häm başqalar. Bıyıl isä Watan suğışında qatnaşqannar istälegenä alleya açıldı. Çäçäklär utırtılğan, yal iter öçen eskämiälär quyılğan, taş cäyelgän bu alleya awılnıñ iñ üzäk öleşendä. Tik qızğılt-körän märmärdän eşlängän fontan ğına su attıra almadı.
-Qış köne bik qatı salqınnar buldı. Cir bik nıq tuñğan. Torbalar ütkärä almadıq,-di xakimiät başlığı Fäyzulla Kamalov. İsäpläre ozaqqa suzmıyça fontannı eşlätep cibärü. Ozaqlamıy awıl xalqın söyenderep tağın ber bina tözelep betäçäk.
-Sportkomleks sentäber ayında açılaçaq. Anda törle künegülär öçen zallar bulaçaq. Mini futbol, voleybol, basketbol uynap bulaçaq. Trenajerlar, awır atletika, gimnastika zalları bulaçaq. İke qatlı administrativ binası da bar. İnderäy awılında ölkädä iñ berençelärdän başlap yäşüsmerlärne mäktäpneñ sportzalında dzyudoğa häm tatarça köräşkä öyrätä başladılar. Sabantuy täkäsen Tömännän kilgän köräşçegä birep cibärsälär dä ger kütärüdä böten prizlı urınnarnı üzläre aldılar.
9 nçı may könne ütkän bäyräm tantanasında İnderäy awılınıñ tarixına da säyäxät yasaldı. Bıyıl bit awılğa nigez salınğanğa 320 yıl tuldı. Borovoy poselogınnan ayırılıp üzlärendä xakimiät buldırıp kön kürä başlağannarına 15 yıl tuldı.
Elekke yıllarda mäktäptä uqıtuçı bulıp eşlägän Ğaliä apa Sägitullina xäzer İnderäy awılı tarixı muzeynıñ mödire. Ğaliä apa süzlärençä, 1970 nçe yılda awılda 5 kenä uram bulğan bulsa xäzer 23 uram. Här uramnıñ da Ğaliä apa tarixın yaza. Kem berençe kilep yort qorğan, nigä ul isemne quyğannar...
Tömännän 15 çaqırım yıraqlıqtağı İnderäy awılı ütkännärgä ixtiram belän zamança yäşärgä tırışa. Qaysı awılnıñ üzeneñ gazetası bar? Ä menä 1213 keşe yäşägän İnderäyneke bar. “Awıldaşlar” dip atalğan bu basmanıñ 4 sanı bäyräm aldınnan dönya kürde. “A-4” formatına awılnıñ bügenge tormışı da, tarixı da, qotlawlar da, yañalıqlar da urın alğan. İñ cılı süzlär, älbättä, suğış veterannarı turında yazılğan.
“Tölkelek” alanlığında uzğan Awıl bäyräme-Sabantuyğa kilgän 1 genä aylıq Emiliä Yosıypovağa da, 98 yäşlek Miñcihan apa Ğatawllinağa da büläk tapşırdılar.
Nail Alan, Tömän
