“Kamil şäxes tärbiäläwdä dini qimmätlärneñ ähämiäte” seksiäsen säyäsät belgeçe Räfiq Möxämmätşin alıp bardı. Ul seksiä eşe tärtiben bolay bilgeläde
Problemalar bik küp. Bügen yäşlärneñ İslam dinenä qaraşı, möselman ğailäsen buldıru, dini belem birü sisteması turında söyläşergä tieşbez. Äytelgän problemalarnıñ härberse turında da süz quzğatıldı. Seksiä şunısı belän üzençälekle buldı. Anda Tatarstan möselmannarı Diniä näzaräte wäkilläre, Rusiä İslam universitetı rektorı qatnaşsa da, notıqlar söylänmäde, ä turıdan-turı yäşlärgä süz birelde. Räxätlänep fiker alışu, bäxäsläşü mömkinlege tudırıldı. Rafiq Möxämmätşin bik tatarça söylätergä tırışsa da, yäşlärneñ barısı da diärlek rusça aralaşunı yaqın kürde. Berençe bulıp çığış yasağan Sarıtawdan Nail Söläymanov İslam dine nigezendä yäşlärneñ ğailä qoru mäs’äläsenä tuqtaldı. Andıy ğailälärneñ nıq buluın äytte. Şul uq waqıtta millätläre törle bulğan möselmannar arasında nikaxlar artuın da yäşermäde. Nail Söläymanov
Bezneñ Saratov şähärendä möselmannar arasında törle millät wäkillärennän bulğan keşelär arasında nikaxlar arta bara. Ul ayıruça Saratov şähärendä nıq sizelä, ä menä awıllarda alay tügel.
Ğomumän seksiädä dindä millät barmı digän mäs'älä yış kütärelde. Ayıruça İvanovo Cämiğ mäçete imamı İldar Al'bertovnıñ çığış küp bäxäslär tudırdı. Anıñ çığışınnan ber özek
Tatarlarğa qarağanda soñğı waqıtta ruslar häm başqa millät wäkilläre İslam dinen kübräk qabul itä. İvanovada köndä ber urıs qızı mäçetkä kilä. Şuña wäğäzlär dä rusça uqıla.
Seksiädä şulay uq “İslamski prorıyv” bäygesendä tatarlarnıñ ni öçen qatnaşmawı, Mordoviädä İslam balalar lagerın oyıştıru turında fiker alışular buldı. Şulay uq dini belem alu, möselman yäşläreneñ yalın oyıştıru turında söylände.
Landış Xarrasova
