30 avgust könne “Tatar yäşläre könnäre” delegatları Tatarstan başqalası bäyrämendä tamaşa qıldılar. Bıyıl alar Qazan çitendäge “Baytik” lagerında tuqtalğaç, başqalağa bik siräk barıp, Qazannan kilgän qunaqlarnı ğına qabul itep tordılar. Menä nihayät alar 30 könne başqalağa kilep anıñ istälekle urınnarın, şaw-şulı bäyrämnären kürä aldılar. Şul uq könne berniçä töbäktän kilgän yäşlär kilgän cirlärenä kitep tä bardılar. Qalğannarı bäyräm salyutın qarağaç kire urman eçendäge lagerğa qaytıp kittelär. “Baytik”qa qaytıp aşap-eçep bergä cıyılıp tantanalı yomğaqlaw çarasın başlağançı säğät tönge 2lär bula yazdı. “İdel” yäşlär üzäge xezmätkärläre delegatlarda süzlär äytep istälekle büläklär birep, yäşläreneñ dä sawbullaşu konsert nomerları betep, uçaqlar qabızğanda irtänge 4 citte. Anda inde kem niçek yoqlamıy tora ala, şulay tordı. Alay disäk, älege çaranı oyıştıruçılar äytüençä “Tatar yäşläre könnäre”nä kilgän yeget-qızlar tiz genä yoqığa yata torğannardan tügellär ikän. Böten lagernı selketep torğannar, bigräktä Omskilar alarğa başqa berniçä töbäk yäşläre dä quşılğan. Niçek kenä bulmasın 16nçı “Tatar yäşläre könnäre” bıyılğa üz eşen tämamladı, aldan planlaştırılğan oçraşularnıñ barsı da waqıtında ütep, törledän-törle tamaşalar belän ürelep bardı. İkençe yılğa ul nişlär älegä bilgesez. Älegä çarada qatnaşuçı yäşlärneñ ikençe yılğa da oçraşırğa teläkläre bar barın. Bezgä alar monı “Azatlıq”nıñ Qazan byurosına kilgäç äyttelär. “Azatlıq”qa kilgän yäşlärgä kilgändä, monda Tömän, Mari el, Yekaterinburg, Çiläbe, Yaroslav töbäklärennän berär-ikeşär delegat idelär. Färit Kurmanov Tömän şähäre “Yäş buın” oyışması citäkçese, barlıq delegatlar isemennän oyıştıruçılarğa räxmät süzlären citkerde.
16nçı “Tatar yäşläre könnäre”ndä Mari ildän İlsöya digän qız oşamağan yaqlarnı da äytep ütte:
- Kiçke uyınnar waqıtında oyıştıruçılar belän urtaq tel taba almadıq, uyın waqıtında kilep taratular, çikläwlär quyular küp buldı.
Aña başqa yäşlär dä quşıldı. Alar äle teläk-täqdimnären dä äytep kittelär. Täqdimnärneñ iñ yış yañğırağanı “İdel” yäşlär üzägenä üz lagerın buldıru. Bez delegatlar belän qısqaça söyläşkäç, “Tatar yäşläre könnäre” turında tulıraq itep tügäräk östäl artında da söyläştek. Anda törle töbäk yäşläre älege çaranıñ uñay häm citeşep betmägän yaqlarına üz fikerlären äyttelär. Kiläçäktä mondıy çaralarnıñ ütkärergä kiräklegenä basım yasadılar.
Röstäm İsxaqi
