Qazanda qışqa äzerlek bara. 13 sentäberdä şähär xakimiäteneñ qısqa äzerlek buyınça komissiä utırışı uzdı. Anda şähärne cılılıq belän tä’min itü, kommunal’ xucalıqnıñ salqın könnärdä eşläw mömkinlekläre mäsäläläre tikşerelde. Älege eştä aldınğılar bulıp şähärneñ Aviatözeleş rayonı tora ikän. Tatarstan başqalasınıñ citäkçelege şähärneñ, döresräge üzäkneñ, tışqı qıyäfäten qayğırta başladı. Süz Qazan uramnarında bik küpläp urnaştırılğan zur reklama räsemnäre turında bara. Bügenge köndä alarnıñ sanı 2 meñnän artqan. Şähär xakimiäte fikerençä, alar qazannıñ qıyäfäten bozıp tora. Şunda da, başqalanıñ üzägendäge häm olı yullar yanındağı älege reklama bağanaların alırğa kiräk. Bu eş 20 sentäbergä eşlänep betterelergä tieş. Älege ğämällär şaqtıy zur zıyan kitersä dä, bağanalarnı urnaştırğan reklam kompaniäläre älege taläp belän rizalaşqan. Şulay itep, şähärneñ qıyäfäten bozıp torğan, maşina yörtüçelärneñ iğtibarın yuldan çitkä cälep itterep torğan reklamanı qullanmasqa buldılar Qazan üzägendä. Ä şähär xalqı fikerençä, bezgä tağın nindi reklamadan baş tartırğa kiräk?
Ber reklam bar ide, anıñ räsemendä spermatazoid räseme töşerelgän ide. Häm anda “Kiläçäk buın çempionı dip yazılğan” ide. Minemçä, bu bik mäğnäsezlek häm oyatsızlıq. Ğomumän min reklamnarğa qarap yörmim, ä ayaq astına qarap qarap yörergä tırışam.
Uramda şärä qızlar töşkän reklam elenmälären alıp artır idem. Häm şulay uq tämäke, sıra, spirtlı eçemleklär reklamalıy torğan taqtalarnı şähär uramnarınnan alırğa kiräk dip sanıym.
Miña şul reklam taqtalarında xatın-qızlarnı çişenderep kenä quymasınnar ide inde.
Min reklamnı qararğa yaratmıym, alar qızıqlı tügel. Ä bolay reklam kiräk dip sanıym, çönki xalıq şunı qarap üzenä kiräkle törle tawarlar turında mäğlümatnı belä ala.
Min reklamğa qarşı tügel, ul kiräkle äyber. Reklam bulmasa, küp kenä eşlär barmas ide.
Menä qarıy torğan törle kinolar waqıtında şul reklamnı bik küp itep quyalar inde, menä şul qomaçawlıy inde. Uramnarda da kiräksä, kiräkmäsä böten cirne reklam belän tutırdılar.
İnde şatlanğan idek, televideniedä kiçke säğät unnan soñ ğına sıra, tämäke turındağı reklamnarnı kürsätäçäklär digäç. Minemçä, uramnardağı da şundıy tör reklamnarnı tıyarğa kiräk.
Gölnaz Şäyxetdin
