Qazanda soñğı waqıtta mädäniät dönyası görläp tora. Bu Tatarstanda 2006 yıl ädäbiät häm sänğät yılı dip itelü belän dä bäyleder. Niçek kenä buluğa qaramastan, härkönne diärlek respublikada kürgäzmälär açıla, törle konsertlar, festival'lär uza. Bıyıl bilgeläp üteläçäk tatar teatrınıñ 100 yıllıq yubileyına da äzerlek eşläre da qızıp kilä. Şul uñaydan çärşämbe könne Ministrlar Kabinetında premyer-ministr Röstäm Miñnexanov citäkçelegendä kiñäşmä uzdı. Anda süz mädäniät obyektların tözekländerü turında bardı. Kiñäşmädä premyer-ministr urınbasarı-mädäniät ministrı Zilä Välieva, tözeleş, arxitektura häm toraq-kommunal' xucalıq ministrı Marat Xösnullin, finans ministrı Radik Ğayzatullin häm başqa räsmi zatlar da qatnaştı.
Tatarstanda küp kenä mädäniät binaları cimerelergä torsa da, kiñäşmädä süz barı tik Qamal, Tinçurin teatrlarında häm Tatar filarmoniäsendäge eşlär barışı turında bardı. Älege öç binada tözekländerü eşläre inde cäy urtalarında başlanıp kitte. Şunlıqtan, çärşämbedä uzğan kiñäşmädä, tözekländerü eşläre buyınça täğäyenlängän aqça häm eşlänü waqıtları ğına raslandı. Ğomumän, älege mädäniät binaların tözekländerü eşlärenä respublika byudjetınnan 250 million sum aqça bülenep birelgän.
Bügenge köndä älege binalarda nindi eşlär baruı xaqında Azatlıq radiosına Qamal teatrı citäkçese urınbasarı Räis Cäpparov bolay dip belderde.
“Bügenge köndä bez säxnäneñ texnik caylanmaların alıştırdıq. Tizdän çit ildän cihazlar qaytırğa tieş. Şulay uq yaqın arada säxnäneñ idänen alıştıraçaqbız. Xäzergese waqıtta teatr tübäsendä remont eşläre bara. ”
Räis Cäpparov äytüençä, Qamal teatrınıñ foyesı tözekländerelep, tamaşa zalına konditsionerlar quyılaçaq. Tinçurin teatrı binasında da zur remont eşläre başlandı. Bu xaqta Azatlıq radiosına Fänis bolay dip belderde.
“Bügenge köndä säxnä östendäge tübä yabıldı, tamaşa zalı çistartıldı. Böten kiräk-yaraq eşlärne başqarıp çığu öçen eşlänep quyıldı. Küp kenä injener tikşerü eşläre ütkärelde. Bügenge köndä bezneñ artistlar repetitsiälär alıp baralar. Bezneñ eşlär tuqtalmıy. ”
Älege teatrlarda remont eşläre barğanlıqtan, yaña sezonnı alar üzläreneñ säxnälärendä aça almayaçaq. Qamal teatr yaña 101нче sezonnı 13 oktäberdä Qazannıñ Kaçalov isemendäge rus teatrı säxnäsendä “Zäñgär şäl” belän açaçaq dip kötelä. Qamallılar yıldağıça teatrnıñ elekkege baş rejisserı Marsel' Sälimcanovnıñ tuğan köne uñayınnan 7 noyäberdä säxnädä yaña spektakl' quyılaçaq. Ul - Tufan Miñnullinnıñ uzğan "Yaña tatar p'yesası" bäygesendä ciñgän "Altı qızğa ber kiäw" äsäre.
İkençe premyera G.Qamal teatrı säxnäsendä dekaberdä, Tatar teatrınıñ 100 yıllığına bağışlanğan bäyräm atnalığında uzaçaq. Anda Näqi İsänbätneñ "Gölcamal" äsäre kürsäteläçäk.
Şulay uq Qazannıñ Kärim Tinçurin isemendäge teatrı da yaña 74-nçe sezonın 5 oktäber könne Säit Galiev mädäniät sarayında, Danil Salixovnıñ "Tanışu-qawışu teatrı"belän açarğa niätli. Dekaberdä isä yañartılğan binada akterlar Tatar teatrınıñ 100 yıllığına bağışlanğan tantanalı kiçä täqdim itäçäk.
Gölnaz Şäyxetdin
