Küptän tügel Rusiä eçke eşlär ministrlığı qabul itkän maxsus qanun buyınça, bayraqlı nomerlı 1600 maşinadan 625, türälärneñ açı tawışlı, zäñgär mögezle 7500 timer atları 1000gä qalırğa mömkin. Rusiä Däwlät Duması räise Boris Grıyzlov şuşı könnärdä ük deputatlarnı yörtüçe maşinalardan mayaqların, maxsus nomerların aldırtırğa wäğdä birgän. Tatarstanda mayaqlı, bayraqlı maşinalar belän yörüçe deputatlar yuq diärlek. Bezgä bu xaqta Tatarstan däwlät şurası deputatı Röstäm Zakuanov citkerde. Ul şulay uq maxsus qanun nigezendä mayaqlı, qıçqırıp yörüçe timer atlarnı kimetügä dä deputat bularaq üz fikerlären äytte:
- Deputatlar häm başqa waq türälär ğadi xalıq belän ber däräcädä yulda yörülärenä min qarşı tügel. Yul iminlege xäräkäten tä'min itüçelärneñ dä baş-baştaqlıqların kürerlär. Ä menä prezident, xökümät başlıqlarınıñ maşinalarında mayaqlar kiräkter ul, çönki eşläre tığız, här cirgä ölgerergä kiräk. Ä bezneñ Däwlät Şurası deputatlarınıñ avtomobillärendä maxsus utlar da, tawış çığaru caylanmaları da, bernidä yuq. Ğädäti keşelär, başqala xalqınıqı şikelle maşinalarda, şundıy şartlarda yöribez.
Deputatlar mayaqlı maşinalar bulmağaç eşlärenä baru qıyın bulmas mikän digän sorawğa Röstäm Zakuanov:
- İrtäräk çığarlar!
Bu Tatarstan däwlät şurası deputatı süzläre buldı. Mäskäw türäläreneñ zäñgär mögezle maşinalarınıñ mögezlären qısqartsalar, Tatarstanda, Qazanda bu yaqtan xällär niçek ikän soñ? Kemnär bezneñ maxsus tawışlı, utlı maşinalar belän yöri ala, kemnär yaramağan kileş yöri? Şundıy sorawlar belän bez Tatarstannıñ eçke eşlär idäräsenä möräcäğät ittek. Eçke eşlär ministrlığınıñ yul xäräkäte iminlege däwlät inspeksiäse idäräsennän Güzäl Täxävetdinova söyli:
- Bezdä Tatarstan respublikasında mondıy problema anıñ xätle qatlawlı tügel. Eçke eşlär ministrlığı prikazı buyınça mayaqlı maşinalarda yörergä prezidentqa, premyer-ministrğa, däwlät şurası räisenä röxsät itelä. Şuña östäp “aşığış yärdäm”, yanğın sünderüçelär kebek 11 oyışmağa andıy maşinalar belän yörergä yarıy.
Sez Tatarstannıñ yul xäräkäte iminlegen tä'min itüçelär idäräse wäkile Güzäl Täxävetdinovanı işettegez. Ul şulay uq üz beldekläre belän maşinalarına mayaqlar quyıp yörüçelär barlığın äytte. Andıylarnı mayaları belän bergä totsalar, maşina yörtü tanıqlığı şunduq alına ikän. Rusiä sotsiologları şuşı uñaydan xalıqtan soraştıru uzdırğannar. Sorawnı alar “Kemnärneñ maşinalarında maxsus tawışlarnı, yaqtırtqıç utlarnı qaldırırğa? - dip quyğannar. 80% xalıq “aşığıç yärdäm” maşinasında, 76 yanğın sünderüçelärdä, 54 protsent xoquq saqçılarınıñ timer atlarında mayaqlar bulsa yarıy digän. Yulda yöregändä östenlek bulsın dip prezidentlar öçen 15, deputatlar öçen 2, gubernatorçalarğa 1 protsent qına xalıq tawış birgän.
Röstäm İsxaqi
