Qazannıñ “Aq bars” bankı filialınıñ citäkçese Sania Teregulova 130mln. sumğa yaqın kredit birä. Şul eşe belän xäzer yıl yarımğa iregennän mäxrüm qalırğa mömkin. Mömkin genä tügel, Waxitov rayonı mäxkämäse aña yıl yarımğa koloniägä yullama yazıp birgän inde. Farazlawlarğa qarağanda Teregulova bu yullamağa qarşı töşer häm Tatarstannıñ Yuğarı mäxkämäsenä möräcäğät itär. Çönki elekkege “Aq barsı” bankı filialınıñ citäkçese aña qarata bulğan ğayıpläwne qabul itmi, min kredit aluçı Samatova qorbanı buldım di. Teregulova citäklägän “Aq bars” filialınnan 130mln.sumğa yaqın kredit aluçı keşe Mönäwärä Samatova Bawlıdağı “Elemtä” oyışmasınıñ citäkçese dä bulıp ala. Ul kübräk qanunsız eşmäkärlek belän şöğellängän bulıp çığa. Ğomumi summası 130mln. sumğa yaqın kreditnı “Aq bars” bankı filialınıñ citäkçese Teregulova küp kenä närsälärgä küz yomıp Samatovağa birä. Ul aqçalarnıñ kübesen kredit aluçı kire qaytarmıy. Bank citäkçelege qaytarılmağan kreditnı belügä, Teregulovanı eştän qualar häm ozaq ta ütmi aña qarata cinayät eşe quzğatıp, koloniägä yullama da tottıralar. Ä menä qayçandır Rusiä däwlät Dumasında deputat bulğan Sergey Şaşurin 2004 yılnıñ martınnan birle timer çitlek artında inde. Xäzer ul Tatarstannıñ 10 nçı nomerlı ğomumi rejimlı Mendeleewsk koloniäsendä üz cäzasın ala. Şaşurin irekkä 2008 yılda çığarğa tieş. Uzğan yılnı Şaşurin tizräk çıygarmassıyz mikän digän ğariza yaza. Moña maxsus komissiä tözelgän, anıñ sostavında koloniäneñ idäräsendä eşläwçelär. Alar cinayätçeneñ tärtiben qarap-küzätep baralar häm cinayätçe koloniä tärtiplärenä ber süzsez buysınsa waqıtınnan aldan irekkä çığarırğa mömkinnär. Şaşurinnıñ ğarizasın Mendeleewsk rayon mäxkämäse kire qağa. Siña waqıtınnan alda çığarğa yaramıy, koloniädä bik ozaq bulmasañ da, timer çitlek tärtiben bozğansıñ, küp ştraf izolyatorlarda utırğansıñ dip üteneçen kire bora. Annan soñ küpmeder waqıt ütä häm Şaşurinğa tağın irtäräk çığu mömkinlege tua. Läkin koloniädän kilgän soñğı xäbärlärgä qarağanda Şaşurin tiz genä çitlektän çıqmas buğay. Ul tağın koloniä tärtiben bozğan, annan käräzle telefon tabıp alğannar. Ä andıy uyınçıqlar koloniädä tıyılğan bula. Şaşurinğa telefonnı koloniädä eşläwçelärneñ berse alıp kerep birä. Elekke däwlät Duması deputatına Mendeleewsk koloniäse idäräse käräzle telefon qullanğan öçen 10 täwlek ştraf izolyator belän cawap qaytaralar. Moña qarşı çığıp Şaşurin Mendeleewsk rayon mäxkämäsenä zarların belderä. Min telefonnan koloniä idäräse belän kileşep söyläştem dip kilä. Rayon mäxkämäsendä koloniäneñ wağraq eşçeläre, bez bulğanda ul telefonnan söyläşmäde dip äytälär. Waqiğa Şaşurin faydasına betmi, ul cäza waqıtın qısqarta almıy. Deputat bulıp alğan Şaşurin telefon arqasında cäza alsa, elekke Qazan metrosı militsiäse başlığı Fidail Xäbibullinğa xatın-qızlarğa seksual' xarakterda bäylänä, eş urını belän tieşsez qullana, qanunsız räweştä aqçalarnı üzläşterä digän ğayıplär tağıla. Tatarstannıñ Yuğarı mäxkämäse älege ğayıplärne tikşerä, podpolkovnik ta bulğan Xäbibullinğa berni bulmıy. Annan bu ğayıplärne eşne tikşerü däwerendä alıp beterälär. Xäzer ul eçke eşlär ministrlıysında ölkän inspektor bulıp eşli dip xäbär itä “Vremya i dengi” gazetası.
Röstäm İsxaqi
