Bik ozaq yıllar buyı küplär “Mejdu Volgoy i Uralom” dip atalğan radiojurnalnıñ tawışın işetep kilä. Jurnal küp kenä respublikalarğa üzlären zur ber ilneñ ber öleşe itep toyarğa yärdäm itä.
1958 yılnıñ iyün ayınnan birle İdel Ural arası dip atalğan radiojurnal daimi efirğa çığıp kilä. Bik ozaq yıllar däwamında ul altı respublikanı berläşterep tordı. Alar Tatarstan, Başqortstan, Mordoviä, Mari-El, Udmurtiä, Çuaşiä. Häm menä 1998 yıldan birle bu isemlekkä Komi respublikası da kerde.
Tapşıru älege respublikalarnıñ tormışın yaqtırtuğa bağışlana. Atna däwamında jurnalistlar iñ qızıqlı mäğlümatlarnı tuplap, respublika tormışın surätläwçe syujetlar äzerläp Qazanğa cibärälär. Tatarstan däwlät radiosınıñ Yoldız Krepostina citäklägän maxsus bülek älege tapşıru tuplap här yäkşämbe könne Mäskäw waqıtı belän irtänge säğät sigezdä ozın dulqınnarda efirğa çığa. Qısqası, şuşı ber säğät däwamında 7 respublikanıñ töp radiokanalları çıbıqlı radioçeltär häm däwlät radiosı yışlıqları aşa beryulı efirğa çığa.
Daimi räweştä älege jurnalnıñ xäbärçeläre Rusiäneñ törle şähärlärendä cıyılıp ber-berse belän täcribä urtaqlaşa, jurnalnıñ texnik häm icadi yağı turında fiker alışa. Şuşı könnärdä Qazanda näq menä şundıy oçraşu uzdı. Radiojurnalnıñ 7 respublikada eşläp kilüçe töbäk citäkçeläre cıyıldı. Töp söyläşü jurnalnıñ sıyfatın yaxşırtuğa häm kiläse yäkşämbedä cide respublika arasında radioküper buldıru turında bardı.
Şunı da äytergä kiräk, moñarçı aldan yazılıp äzerlänüçe älege tapşıru berençe tapqır radioküper räweşendä turı efirda çığaçaq. Älege söyläşü awıl-xucalığı il küläm proyektınıñ respublikalarda niçek tormışqa aşırıluına bağışlanaçaq. Rusiä awıl-xucalığı ölkäsendä bik aktiv häm uñışlı eşläp kilä. Şuña kürä radiojurnal şuşı proektı tormışqa aşırğa bulğan. Oyıştıruçılar äytüençä, här respublikada älege ölkädä näticälär dä bar häm alarnıñ härberse awıl-xucalığı belän bäyle problemalarnı üzençä xäl itä. Häm şuşı xaqta kiläse yäkşämbedä respublika awıl-xucalığı citäkçeläre söyläşäçäk.
Bilgele bulğança, İdel-Ural arasındağı radiojurnal nigezdä iqtisat, citeşterü möhite turında söyli. Kisken säyäsi temalarğa qağılmıy. Şulay da Tatarstan, Başqortstan, Mari, Udmurtiä, Mordoviä, Çuaşiä, Komi xalıq mädäni tormışına da urın birelä. Ul millätçe radio tügel häm 1918 yılda tözelä başlağan İdel-Ural ştatları säyäsätennän bik yıraq. Ämma tapşırularına qarağanda İdel häm Uralda tatar, başqort, çuaş, mari xalıqları haman da bar.
Gölnaz Şäyxetdin
