Färidä Ğaffarova tatar milläte yazmışı öçen can atıp yäşägän şäxes. Ul
Tatarstan fännär akademiäseneñ Şihabetdin Märcäni isemendäge tarix institutında eşläp, şaqtıy ğına fänni xezmätlär çığardı. Şul uq waqıtta ul ğailä canlı keşe dä ide. İre – yazuçı Äxät Ğaffar belän alar ike qız tärbiäläp üsterdelär.
Färidä Ğaffar düşämbe könne kiç insul'ttan wafat buldı. Äle sentäber azağında ğına ul Törkiädä bulıp qaytıp, anda uzğan törki xalıqlar qorıltayı turında “Azatlıq“ radiosına şaqtıy xislänep söylägän ide.
Färidä xanımnı ğomumän çit illärdä dä şaqtıy belälär ide. Bu xaqta “Azatlıq” radiosına Färidä Ğaffarova belän universitetta bergä uqığan, annarı bergä eşlägän Tarix institutı direktorı urınbasarı Färit Soltanov:
Bez bergä uqıdıq häm bergä eşlädek. Anı böten tatar cämäğätçelege belä Amerikada da, Almaniädä dä. Ul Sadri Maksudi turında yazdı. Ali Aqış isän çaqta kitabın yazıp qulına tapşırıyq äle dide. 9 dekaberdä 55 yäş bulaçaq ide. Kitabın çığarırğa äzerlänä idek.
Fälsäfä fännäre doktorı Färit Soltanov belderüençä, Färidä Ğaffarova dönyağa tanılğan millätçe, Sorbonna universitetın tämamlağan Sadri Maksudi turında barlıq mäğlümatnı bäynä-bäynä öyränep fänni xezmät yazıp zur eş başqardı. Häm anı tatarça yaqlap barısın da ğäcäpländerde. Färit Soltanov:
Üzgärtep qoruğa qadär dissertatsiälärne rusça ğına yaqlıylar ide. Üzgärtep qorudan soñ berençe bulıp KDUda tatar telendä dissertatsiäne Färidä Ğaffarova yaqladı häm bu yañalıq buldı.
Färidä Ğaffarovanıñ olı qızı Läylä Törkiädä aspiranturada ingliz tele häm ädäbiätı buyınça belem alıp qayttı, xäzer Sankt-Peterburgta xezmät itä, keçe qızı Sömbel Qazan däwlät universitetın tämamlap bügenge köndä “Söyembikä” jurnalında eşli. Ul qızların da millätpärvär itep tärbiäläde. Ğomumän Färidä Ğaffarova ğadi keşe ide. Şuña anı soñğı yulğa ozatuğa da şaqtıy keşe cıyıldı. Färidä xanımnı üze tuğan Qukmara rayonı Qamışlı awılında cirlädelär.
Landış Xarrasova
